Keıin qaza tapqandardyń atalǵan elge reseılik áskerıler jaıynda fılm túsirýge barǵan Kırıll Radchenko, Aleksandr Rastorgýev jáne Orhan Djemal ekendigi anyqtalyp otyr.
Osy jaǵdaıatqa baılanysty Reseı Syrtqy ister mınıstrliginiń resmı habarlamasynda «О́kinishke qaraı Reseı elshiligi Ortalyq Afrıka Respýblıkasyna reseılik jýrnalısterdiń kelgendiginen habarsyz boldy. Qazir dıplomatııalyq mıssııa ókilderi qaıǵyly oqıǵanyń mán-jaıyn anyqtaý jáne máıitterdi elge jetkizý maqsatynda jergilikti quqyq qorǵaý organdarymen jáne memlekettik qurylymdarmen tyǵyz jumys jasaýda», delingen.
Marqumdarǵa jaqyn adamdardyń buqaralyq aqparat quraldaryna habarlaýynsha, reseılikter mingen avtokólik belgisiz qarýly adamdardyń shabýylyna tap bolǵan. О́tkizý beketine taıaǵan kólikke tasadan oq atylyp, bul shabýyldan tek kólik júrgizýshisi ǵana aman qalǵan.
«Interfaks» agenttiginiń boljamynsha, qaskóıler avtokólikke tonaý maqsatynda shabýyldaýy múmkin.
Qaza tapqan Orhan Djemal 51 jasta. Ol ár ýaqyttary «Vechernıaıa Moskva», «Nezavısımaıa gazeta», «Novaıa gazeta» jáne basqa da basylymdarda eńbek etken. Áskerı tilshi retinde soǵys órti órshigen Soltústik Kavkaz, Ońtústik Osetııa, Aýǵanstan, Irak pen Sırııadaǵy shaıqastardyń ortasyna baryp habar taratqan.
Sondaı-aq 47 jastaǵy rejısser Aleksandr Rastorgýev pen 33 jastaǵy operator Kırıll Radchenkonyń da nebir shıelenisken aımaqtarda jumys tájirıbesi bar mamandar ekendigi belgili boldy.
Jalpy, Ortalyq Afrıka Respýblıkasynda soǵys órti 2013 jyly tutanǵan bolatyn. Sońǵy bes jyldyqta eldegi bılik qoldan-qolǵa ótip, aımaqqa BUU-nyń bitimgerlik kúshi de engizilgen edi. Osyǵan qaramastan respýblıkada qarýly qaqtyǵystar tolastamaı tur.
«Shekarasyz reporterler» halyqaralyq uıymynyń málimetterine súıensek, ótken jyly álem boıynsha 65 jýrnalıst mert bolǵan. Uıymnyń derekterine qaraǵanda, buqaralyq aqparat quraldary ókilderiniń qyzmeti úshin Sırııa, Meksıka, Aýǵanstan, Irak jáne Fılıppın memleketteri qaýipti sanalady.
Serik ÁBDIBEK,
«Egemen Qazaqstan»
