Búginde Qyzylorda qalasynda elektr jáne aýyzsýmen jabdyqtaýshy kommýnaldyq kásiporyndarynda «Smart sıtı» úlgisinde jumys isteý, energoúnemdegish qondyrǵylar, qashyqtyqtan basqarylatyn esepteýish quraldaryn ornatý, bir ortalyqtan basqarý júıesin engizý jumystary qolǵa alyndy.
Elbasynyń halyqaralyq qarjy uıymdarynyń áleýetin paıdalaný jónindegi tapsyrmasyna sáıkes, Eýropalyq qaıta qurý jáne damý bankimen birlesip Qyzylorda qalasynyń sýmen qamtý jáne sýdy burý júıesin qaıta jańǵyrtý jobasy iske asyrylýda. Joba barysynda oblys ortalyǵynyń aýyzsýmen jabdyqtaý jáne sýdy burý júıesin basqarý, jerasty aqaýlaryn anyqtaıtyn zamanaýı tehnıkalar satyp alyndy.
Tutynýshylar tarapynan kommýnaldyq tólemderdi ońtaılandyrý maqsatynda ótken jyldan bastap biryńǵaı tólem qujaty engizildi. Búginde Qyzylorda qalasy tutynýshylarynyń 80 prosentten astamy osy qyzmet túrin paıdalanýda.
2017 jyldyń 1 shildesinen bastap qanatqaqty joba retinde «Aqmeshit», «Mereı» shaǵyn aýdandarynda biryńǵaı tólem qujatyn engizý jobasy bastaldy. Búginde atalǵan jobaǵa qatysty barlyq kommýnaldyq qyzmet kórsetetin mekemeler arasynda birqatar jumys júrgizildi.
Qazirgi tańda avtomatty túrde telefon jáne habarlama arqyly eskertý fýnksııasy ázirlenýde. О́tken jyldyń qyrkúıek aıynda ótken memlekettik konkýrstyń nátıjesinde «Qyzylorda tazalyǵy» JShS, «Turǵyn úı qyzmeti» MKK jáne «Energoservıs» JShS men bıllıng baǵdarlamasyn ázirleý, biryńǵaı tólem júıesine engizý, tólemderdi qabyldaý boıynsha kelisimsharttar jasalyp, búgingi tańda «Qyzylorda tazalyǵy» JShS-niń 15 myń, «Turǵyn úı qyzmeti» MKK-niń 16 myń tutynýshysy bıllıng baǵdarlamasyna engizildi.
Qańtar aıynda elektr, jylý energııasy, «Qyzylorda tazalyǵy» JShS jáne «Turǵyn úı qyzmeti» MKK, ishinara sý men sý burý kommýnaldyq qyzmetteri qalyptastyrylǵan 79 myń biryńǵaı tólem qujaty taratyldy.
«Qaýipsiz úı» jobasy boıynsha «Qazaqtelekom» AQ fılıalymen kópqabatty úılerdiń kireberisine beınebaqylaý júıesin ornatý jobasy júzege asyrylýda. Joba aıasynda aǵymdaǵy jyly kópqabatty úılerdiń 588 kireberisine jáne birinshi qabattaryna beınebaqylaý kameralary ornatyldy. Joba Qyzylorda qalasyndaǵy kópqabatty turǵyn úılerdiń jáne turǵyndardyń qaýipsizdigin qamtamasyz etýge múmkindik beredi.
«Aqyldy» elektr jelileri boıynsha 2018-2019 jyldary Qyzylorda qalasynda jáne qala aýmaǵynda ornalasqan 300-den asa kópqabatty úıdiń 10/0,4 kV qosalqy stansalarynyń sórelerinde ornalasqan 600 elektr energııasy eseptegish quralyn elektr energııasyn baqylaýdyń avtomattyq júıesine engizý josparlanýda.
Atalǵan jumystardy júrgizý kópqabatty jáne jeke turǵyn úı sektorlaryndaǵy elektr energııasynyń urlyǵyn tómendetýge jáne jeli parametrlerin baqylaý arqyly 10/0,4 kV qosalqy stansalaryndaǵy aqaýdy jedel anyqtaýǵa jáne qalpyna keltirýge múmkindik beredi.
Qala ınfraqurylymynyń damýy jáne jańa sý qubyrlary jelileri qurylystarynyń júrgizilýine baılanysty turǵyndardyń sany artyp, tıisinshe sý tutyný kóleminiń artýy saldarynan ysyrapqa jol berilýde. Osy oraıda sýmen qamtýdy jáne sý burýdy baqylaý júıesi jobasy aıasynda sýmen qamtý júıelerin jańǵyrtý jáne jaqsartý maqsatynda Qyzylorda qalasynyń bıýdjettik mekemelerinde modemmen jasaqtalǵan sý eseptegish quraldaryn ornatý josparlanýda.
Joǵaryda atalǵan jumystardy júrgizý nátıjesinde sýmen qamtý júıesiniń paıdalaný senimdiligi artady, sýmen qamtý jumysy úzdiksiz bolady. Eseptegish quraldardy ornatý esebinen sýmen qamtý júıesiniń jáne tehnologııalyq úrdisteriniń mańyzdylyǵy artady. Bul baǵyttaǵy jumystar budan ári jalǵasyn tabýda.
Medet ÝSAIN,
Qyzylorda oblystyq energetıka jáne turǵyn úı-kommýnaldyq sharýashylyq basqarmasynyń basshysy
Qyzylorda oblysy
