Aǵymdaǵy jyldan bastap elimizde «Nur Otan» partııasynyń bastamasymen Qazaqstan Respýblıkasynyń Eńbek jáne halyqty áleýmettik qorǵaý mınıstrligi men «Memlekettik áleýmettik saqtandyrý qory» aksıonerlik qoǵamymen birlese «Qazaqstannyń úzdik áleýmettik jobalary» baıqaýy qolǵa alynǵan bolatyn. Atalǵan baıqaý sáýir aıynda jarııalanyp, jobanyń irikteý kezeńi aımaqtarda bastaý alǵan edi. Taraz qalasynda osy issharanyń aımaqtyq kezeńiniń irikteý saltanaty bolyp ótti.
Saltanatty sharaǵa «Nur Otan» partııasy Jambyl oblystyq jáne Taraz qalalyq fılıaldarynyń basshylyǵy men qyzmetkerleri, memlekettik organdardyń ókilderi, úkimettik emes uıymdar ókilderi men joba avtorlary, bastaýysh partııa uıymdarynyń tóraǵalary, múmkindigi shekteýli azamattar men «Jas Otan» jastar qanatynyń músheleri men belsendileri qatysty. Jıynda «Nur Otan» partııasy Jambyl oblystyq fılıaly tóraǵasynyń birinshi orynbasary, komıssııa tóraǵasy Murathan Shúkeev sóz alyp, ómirlik qıyn jaǵdaıǵa tap bolǵan tulǵalarǵa kórsetiletin qyzmetterdi qosa alǵanda, ózekti áleýmettik máselelerdi sheshýge baǵyttalǵan bastamashyl áleýmettik jobalardy qoldaý baıqaýdyń basty maqsaty ekenin, atalǵan baıqaý arqyly elimizde iske asyrylatyn úzdik bastamashyl áleýmettik jobalardy anyqtap, usynylǵan áleýmettik jobalarda qoldanylǵan úzdik tájirıbelerdi keńinen taratyp, ózekti áleýmettik máselelerdi sheshýde memlekettiń, azamattyq qoǵamnyń, bıznestiń jáne azamattardyń kúshin biriktirý maqsat ekenin atap ótti. Sondaı-aq atalǵan baıqaýdyń óńirlik kezeńiniń ótýine demeýshilik jasaǵan «Qazfosfat» jaýapkershiligi shekteýli seriktestiginiń bas dırektory, Qazaqstannyń Eńbek Eri Muqash Eskendirovke alǵys bildirdi. О́z sózinde Jambyl oblysy ákiminiń birinshi orynbasary Bekbolat Orynbekov óńirde búginde 43 myń múmkindigi shekteýli azamattyń bar ekenin, olarǵa laıyqty qoldaý kórsetilip kele jatqanyn, bul maqsatqa ótken jyly 45 mıllıon teńge qarastyrylsa, bıyl 29 jobaǵa oblystyq bıýdjetten 271 mıllıon teńge bólinip otyrǵanyn jetkizdi. Budan keıin «Qazaqstannyń úzdik jobasy-2014» baıqaýynyń jeńimpazy, «Amazonka» qaıyrymdylyq qorynyń jetekshisi Anjelıka Sarıan sóz alyp, qoldaýy úshin tıisti azamattarǵa alǵys aıtty.
Baıqaýdyń erejesi boıynsha joba avtorlary «Áleýmettik problemalardy sheshýdegi aqparattyq ilgeriletý», «Áleýmettik salada eriktiler qozǵalysyn damytý», «Teń múmkindiktermen qamtamasyz etý», «Múgedektigi bar tulǵalardy qosa alǵanda, azamattardy jumyspen qamtýǵa yqpal jasaý» jáne ózge de baǵyttar boıynsha Taraz qalasy men aýdandardan óz jobalaryn usynyp, oblystyq kezeńge joldama alǵan bolatyn. Atap aıtar bolsaq, Taraz qalasynan 4, Shý aýdanynan 3, Qordaı jáne Merki aýdandarynan 2 jobadan, Baızaq, Jambyl, T.Rysqulov, Talas jáne Sarysý aýdandarynan 1 jobadan barlyǵy 16 joba usynylǵan. Baıqaý qorytyndysy boıynsha birinshi oryndy «Taraz qalalyq múgedekter qoǵamy» qoǵamdyq birlestiginiń tóraıymy Aqbópe Qalenova jeńip aldy. Atalǵan birlestiktiń «Júrekten – júrekke» jobasy boıynsha daıyndaǵan beınerolıgi kópshilikke kórsetildi. Budan soń kópshilik «Aınalaıyn» balalar men jasóspirimder ortalyǵy» jastar klýby» qoǵamdyq birlestigi» IýNESKO-klýbynyń «Etno Art Fest» jobasy boıynsha daıyndaǵan beınerolıkti tamashalady. Nátıjesinde atalǵan klýb tóraıymy Aıgúl Razaqova ekinshi orynmen marapattaldy. «Qazaqstannyń úzdik jobalary» respýblıkalyq baıqaýynyń oblystyq kezeńine belsendi qatysqany úshin úshinshi oryndy Jambyl oblystyq «Onkologtar assosıasııasy» qoǵamdyq birlestiginiń tóraǵasy Abylaıhan Batyrov ıelendi. Kópshilik nazaryna atalǵan birlestiktiń «Ýaqtyly dıagnostıka – densaýlyq kepili» jobasy boıynsha daıyndaǵan beınerolıgi usynyldy. Baıqaý jeńimpazdary men júldegerlerine qarjylaı syılyqtar men arnaıy dıplomdar tabys etildi.
Budan keıin oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Jorabek Baýbekov pen oblystyq ishki saıasat basqarmasynyń basshysy Berik Qurmanǵalı «Qazaqstannyń úzdik áleýmettik jobalary» respýblıkalyq baıqaýynyń oblystyq kezeńine belsene qatysqany úshin Taraz qalasynan «Jandaný» múgedekter qoǵamdyq birlestiginiń tóraǵasy Zaıtjan Iýldashev, Merki aýdanynan «Paryz-Merki» jastar qoǵamdyq birlestiginiń tóraıymy Ǵalııa Qajyǵalıeva, Shý aýdanynan «MAR-NUR kompanııasy» jaýapkershiligi shekteýli seriktestiginiń quryltaıshysy Ǵalııa Ábitaeva, Qordaı aýdanynan «Paryz» múgedekterge qoldaý kórsetý» qoǵamdyq birlesiginiń tóraıymy Baıan Qaramoldaeva jáne T.Rysqulov, Talas, Baızaq aýdandarynan ózge de qoǵamdyq birlestikter tóraǵalaryn marapattap, olarǵa arnaıy dıplomdar men baǵaly syılyqtar tabys etti. Baıqaý barysynda Gúlderaıym Nurmoldaeva, Nurbol Dúısenqul, Aqtóre Asqar, Nuraı Ǵanıqyzy sııaqty ónerpazdar ánnen shashý shashty. Al irikteý kezeńinde úzdik dep tanylǵan jeńimpaz jobalar komıssııa sheshimimen aldaǵy qyrkúıek aıynda Astana qalasynda ótetin baıqaýdyń respýblıkalyq kezeńine joldandy.
Hamıt ESAMAN,
«Egemen Qazaqstan»
Jambyl oblysy
