Qalalyq Qorshaǵan ortany qorǵaý jáne tabıǵatty paıdalaný basqarmasynyń mamandary jańa gúlzarlardyń erekshelikteri týraly aıtyp berdi. Kreatıvti gúlzardyń biri Saryarqa aýdanynda Birjan sal kóshesi boıynda men Respýblıka dańǵyly men Y.Dúkenuly kóshesiniń qıylysynda ornalasqan. «Gúlzardyń aýmaǵy tolyǵymen abattandyrylyp, jaryqtandyryldy, sporttyq jáne balalar alańdary ornatylǵan. Sáýlettik keńistik qurylymynyń arqasynda árbir gúlzardyń ózine tán qaıtalanbas stılge ıe», - dedi basqarmanyń mamany Erasyl Sembaev. Respýblıka dańǵyly men Y.Dúkenuly kóshesiniń qıylysynda ornalasqan shaǵyn saıabaq «Illıýzııalar gúlzary» degen ataýǵa ıe. Munda skeıtdrom, optıkalyq ıllıýzııany jasaý úshin qoldanylatyn qısyq formadaǵy Eıms bólmesi, syrǵanaq tóbeshigi jáne balalar alańy bar.
Al Birjan sal kóshesindegi №5 turǵyn úıdiń janyndaǵy gúlzar «Shabadandar baǵy» degen ataýǵa ıe boldy. Sebebi, ol temirjol vokzalyna jaqyn ornalasqan. Baq aýmaǵynda shabadan formasynda jasalǵan kishi sáýlet formalary ornatylǵan. Joba avtorlary balalarǵa arnalǵan temir jolyn salýdy josparlaǵan. Al qurylysshylar avtordyń oıyn júzege asyrý úshin arnaıy temirden rels jasady. Basqarmanyń tabıǵatty qorǵaý jobalaryn basqarý bóliminiń basshysy Azamat Janataevtyń aıtýynsha, jańa baqtyń ornynda buryn apattyq jaǵdaıdaǵy eki qabatty eski úıler bolǵan.
«Jobalar kreatıvti, belgili taqyrypqa arnalǵan. Bul jerdiń qurylysy 2018 jyldyń mamyr aıynda bastaldy. Vokzal mańyndaǵy baq vokzal túrinde jasalǵan. Gúlzarlar úlken emes, Illıýzııalar gúlzary - 2 765 sharshy metr, al Shabadandar parki 2 293 sharshy metr. Eki jobanyń quny shamamen 130 mln teńge», - dedi A.Janataev. Budan bólek, bıyl qyrkúıek aıynda Saryarqa dańǵylyndaǵy 27 úıdiń mańynda «Tastar gúlzarynyń» qurylysy aıaqtalady. Baqtyń aýmaǵy 2 304 sharshy metr. Qurylys jobasynyń quny shamamen 55 mln teńge.
Bul aýmaq túrli kólemdegi úlken tastarmen bezendiriledi. Tranzıttik aımaq demalysqa arnalǵan úsh alańǵa bólinedi. Bir jaǵynda túrli sporttyq jabdyqtary bar sport alańy, ortasynda alyp tastar bolady. Al úshinshi jaǵynda tamaqtaný men saýda pavılondary bolady dep josparlanǵan.
