Ulttyq quramanyń bas bapkeri Nurym Dúısenov aıtýly jarysta alty balýanǵa senim artyp otyr. Olardyń barlyǵy da dúbirli dodalarda júlde alyp júrgen saqa sportshylar. Máselen, alyptarmen aıqasatyn Nurmahan Tynalıev (130 kılo) álem chempıonatynda úsh ret júldegerler qatarynan kórindi. Azııa oıyndary men Azııa chempıonatyn eki retten utty. Almat Kebisbaev (67 kılo) – álem chempıonatynyń úsh dúrkin júldegeri, Azııanyń eki dúrkin chempıony, Azııa oıyndary men Dúnıejúzilik Ýnıversıadanyń qola júldegeri. Meırambek Aınaǵulov (60 kılo) – byltyr Parıjde ótken álem chempıonatynyń kúmis júldegeri.
Odan bólek ol eki ret qurlyq birinshiliginde júlde aldy. Asqat Dilmuhamedov (77 kılo) – byltyrǵy jylǵy Azııa chempıony jáne sol jarysta ol eki márte qola medaldi enshiledi. Erulan Ysqaqov (97 kılo) – Azııa chempıony, Azııa oıyndary men qurlyq birinshiliginiń júldegeri. Azamat Qustybaev (87 kılo) – Azııa chempıonatynyń qola júldegeri.
Baıqasańyzdar, Jakartaǵa attanatyn balýandarymyzdyń barlyǵy da talaı dúrmekte ysylǵan sańlaqtar. Qazirgi kezde olar Tarazda oqý-jattyǵý jıynyn ótkizýde. Bas bapkerdiń aıtýynsha, ulttyq qurama sapyndaǵy jigitterdiń barlyǵynyń da jeńis tuǵyryna kóterilýge múmkindikteri bar. Sońǵy daıarlyqtaryn pysyqtaǵannan keıin elimizdiń grek-rım kúresi sheberleri Indonezııaǵa attanady.
Sońǵy úsh Azııa oıyndarynyń nátıjesine zer salsaq, grek-rım kúresinen Qazaqstan quramasy árkez tabysty óner kórsetkenin baıqaımyz. 2006 jyly Dohada jalǵyz Roman Meleshınniń bas júldesin qanaǵat tuttyq. 2010 jyly Nurmahan Tynalıev Qazaq eliniń ánuranyn Gýanjoý kóginde shyrqatsa, Darhan Baıahmetov pen Áset Mámbetov kúmis aldy. Al Marat Kárishalov pen Alhazýr О́zdıev qola júldeni ıelendi. 2014 jyly Inchhonda Nurmahan Tynalıev qarsylas shydatpaı, taǵy da altyn tuǵyrǵa kóterilse, Almat Kebisbaev, Dosjan Qartyqov jáne Erulan Ysqaqov syndy saıypqyrandar úshinshi satyǵa jaıǵasty.
Ǵalym SÚLEIMEN,
«Egemen Qazaqstan»
ALMATY
