2018: Qalyńdyq kóılegindegi sońǵy ózgerister qandaı?

Endeshe jahandanǵan zamanda úılený toılarynyń trend­teri de túpkilikti óz­geris­terdi ótkerýde. Toıǵa kıe­tin qalyńdyq kóıleginiń sá­ni qyryq qubylyp tursa da, romantıkalyq beıne bas­ty rólge shyqty. Tipti 2018 jyl­dyń toı maýsymynda sán úlgi­leriniń tóńkerisi júrip jatyr desek te bolǵandaı. Dızaı­nerler qalyńdyqtardyń kıim úlgisin daıarlaýda batyl sheshimderge baryp otyr. Son­dyqtan da aldyn ala kóı­lek satyp alyp qoıǵan bol­sańyz, onda asyǵystyq tanyt­qan bolyp shyǵasyz. Endigi jerde eń sándi qalyńdyq etegi jer syzǵan uzyn fata kıedi. Qalyńdyqqa ıyǵyn jalańash­taý ersi sanalyp, aldamshy jeń­der aldyńǵy kezekke shyq­ty. 

Yqsham da yńǵaıly kóılek

Qalyńdyqtyń kóı­legi minsiz tigilýi úshin dızaı­nerler geometrııalyq syzyq­tardyń ústinde jumys isteýge kóshti. Mysaly, bıyl­ǵy maýsymda modelerler V-beınesindegi dekoltege ba­sym­dyq berip, beldemsheniń sy­zyqtaryn barynsha batyl joǵary qııady. Osy arqyly áıelge tán sulýlyq pen tar­tym­dylyqty alǵa tartpaq. 

Qysqa kóılekterdiń úlgi­sin­de geometrııalyq tigis­ter barynsha aıqyn kóri­nip, arqany ashyq qaldy­rady. Tiginshiler germetıkalyq sy­zyqtarǵa erek­she sán be­rý úshin qoldan to­qylǵan shilterlerdi, injý tas­tarmen kómkerilgen matalar men gúldi oıýlardy paıdalanýda. Kóılektiń árbir bólshegi kór­mege qoıylatyndaı kóz tartyp turýy tıis. 

Shilter matalar eshqashan da sánnen qalyp kórmegen. Biraq bıylǵy maýsymda qustyń qaýyrsynyndaı juqa, názik oıýly shilterler burynǵydan da ózekti bola tústi. Jáne juqa shilterler kóılekte ǵana emes, fata, ıyqqa jamylǵy túrinde de paıdalanylady. 

Sándi fata

Eń bastysy beti ashyl­maǵan kelinniń pák keıpin tanytatyn fatalardan bıyl bas tartýǵa bolmaıdy.­ Toı trendterinde dızaı­ner­­­lerdiń barlyǵy der­lik osy aksessýarǵa erekshe mán be­rip otyr. Myna ǵalam­tor­dyń zamanynda eń ataq­ty, eń tanymal toı modeler­leriniń úlgilerine kóz júgirtip shyqsańyz, qalyń­dyqtyń fatasyna úlken nazar aýdara­tyndyǵyn ańǵarmaý múmkin emes. Jańa túsken keliniń sulý­lyǵyn suq kózden ja­syrǵan fatalar maıda gúl­dermen, gúl destelerimen kóm­kerilip, dramalyq kóńil kúı syılaıdy. 

Jamylǵylar

Endigi jerde sánnen qalmaǵan qalyńdyqqa ıyq jalańashtaý ersi sanalmaq. Jartylaı jalańash toı kóı­lekteri ekinshi qatarǵa syrylyp qaldy. Bul máselede de dı­zaı­nerler ıyqqa  ile salatyn ja­mylǵylardyń kóılektiń áde­miligin jaýyp qalmaýyn qa­­da­­­ǵalap, belgili ólshemderdi saq­­taıdy. 

Kostıýmder

Myna qyzyqty qarańyz, joǵarydaǵy úlgilerdi kezegi­men baıandap otyrsaq-daǵy, kostıýmder men kombınezondar toıdyń sánine basa-kóktep kirdi. Bir jaǵynan bul úlgi toıdyń saltanatymen sıyspaıtyndaı bolyp kórinse de, shilterden to­qylǵan svıterlerge toıdyń sıpatyn berý úshin jyltyr tastar, korsetter qosylyp otyr. Bir jaǵynan bul úrdistiń  enýine qazirgi klassıkalyq kostıýmder men sporttyq stıldiń qabysýy turǵysynan da qaraýǵa bolar.

Aldamshy jeńder

Toı álemindegi kishigirim tóńkeris dep otyrǵanymyz da osy tus. Dızaınerler qalyń­dyqtyń kóılegine alynyp, salynatyn túrli uzyndyqtaǵy jeńder men qolǵaptardy qosyp otyr. Qalaı desek te, bul yń­ǵaıly. Jeńderge kel­gende, sánniń neshe túrli nusqasy tabylady. Qońyraý, kóbelek tárizdes jeńder, tas­tarmen, jyltyraqtarmen kómkerilgen jeńder. Tize berseń bul iste de nebir ismer tiginshiler talantyn tanytyp otyr. 

XXL

«Siz balǵa barýǵa daıyndalyp jatyrsyz ba?», – degen suraq qazir kóne ǵasyrlardyń sózi emes. Dı­zaı­­nerler qalyń­dyqtyń úı­renshikti beınesinen qasha bastaǵan syńaıly. Qara­paıym bolǵan jaqsy, biraq ómirde bir-aq ret bolatyn kún­di nege ertegideı etpeske?! Qa­lyń­dyqqa júz jerden sándi kóılek usynsańyz da, onyń sanasynyń túkpirinde hanshaıym bolý armany qalyp qoıatynyn moıyndaý kerek. Sondyqtan tort sııaqty úlde men búldege oranǵan kóılekter yqylym zamandardaǵy pat­sha­lardyń baldaryn eske túsirýi ábden múmkin. Eger bul da az bolyp kórinse, toı kóı­lekterimen tanylǵan álemdik dızaınerlerdiń birqatary tıýrnıýrlerdi qaıta tiriltip otyr. Iаǵnı ótken ǵasyr­lar­daǵy saltanaty asqan baldarda bıkeshter kóıleginiń art jaǵyna jastyq sııaqty tıýrnıýrdi salyp, bóksesin bólip qoımaýshy ma edi?! 

Qara tús qosyldy

Qarap otyrsaq, búgingi qalyń­dyqtardyń qııalynda bári­bir shek joq eken. Qazir toı­ǵa tek qana appaq kóılek kııý kerek degen túsinik qalyp barady. Jumsaq tús­ter, maıda dala gúlderi qo­sylǵan kóılekterdiń neshe atasy bar. Bul az deseńiz dızaı­nerler toı kóılegine qara syzyqtar, qara tústi detal­dardy da qosyp jiberdi. Nesi bar, pishýi men tigilýi ke­lis­se, jaman kórinbeıdi. Beldi qynaǵan qara lenta, qara gúlder aq kóılektiń ústinde menmundalap erekshe kórinedi. Tek onyń búkil bet-beıneńizben kelisýin aıtyńyz. 

Aınash ESALI,

«Egemen Qazaqstan»

ALMATY