Búgin festıvaldiń alǵashqy kúni Estaı atyndaǵy qalalyq mádenıet saraıynda «Uly dala» halyqaralyq etnofestıvali sheńberinde «Uly dala murasy: tarıh, tulǵa, taǵylym» atty halyqaralyq ǵylymı-tájirıbelik konferensııasy ashyldy.
Jınalǵandardy oblys ákimi Bolat Baqaýov quttyqtady. Osy festıval aıasynda jyl boıy júzege asyrylǵan rýhanı-mádenı sharalardy da atap ótti. Bul kúnderi Baıanaýyl aýdany Teńdik aýylynda Musa Shormannyń kesenesi boı kóterýde. Aqtoǵaı aýyly mańyndaǵy Estaı Berkimbaıulynyń kesenesine jóndeý jumystary júrgizilip, jol salynbaq. Máshhúr Júsiptiń 20 tomdyq shyǵarmalary sandyq júıege kóshirildi. Sultanmahmut Toraıǵyrov mýzeı kúrdeli jóndeýden ótti.
Oblysta Buqar jyraýdyń týǵanyna-350 jyl, Musa Shorman ulynyń 200 jyl, Máshhúr Júsiptiń 160 jyldyǵy, Estaı Berkimbaıulynyń 150 jyldyǵy, Sultanmahmut Toraıǵyrovtyń týǵanyna 125 tolý merıtoılary birinen soń biri atalyp ótýde. Osy bes mereıtoıdyń kýlmınasııasy «Uly Dala Eli» etnofestıvalinde kórinis tabýda.
Etno aýyldarda mereıtoı ıesiniń ómiri, shyǵarmashylyǵyna arnalǵan sahnalyq kórinister, kórmeler uıymdastyrylyp, kórkemsózder oqylady, shyǵarmalary halyqqa keńinen nasıhattalady. Mereıtoı ıelerine arnalǵan respýblıkalyq aqyndar aıtysy, músháıra, jyrshylar baıqaýy jalǵasýda.
Oblystyq ishki saıasat basqarmasynyń málimetinshe, «Uly dala eli» festıvalinde Ertis jaǵasyndaǵy Ertispromenade sahnasynda ashyq aspan astynda S. Seıfýllın atyndaǵy Qaraǵandy oblystyq teatry «Kómekeı áýlıe Buhar jyraý» tarıhı dramasyn sahnalaıdy. Odan keıin «Ertistiń eren Estaıy» atty respýblıkalyq dástúrli ánder festıvali ótedi. Baıqaýda Estaıdyń «Qusnı-Qorlan», «Bir mysqal», «Sandýǵash», «Jaı qońyr», «Iýran-aı» jáne basqa týyndylary oryndalady.
Mereke kórinisi jaǵalaı tigilgen kıiz úıler, qaınaǵan qazan, jaıylǵan dastarqan, shyrqalǵan ánder, tańqaldyrǵan qolóner buıymdary-barlyǵy da ótken ǵasyrlardan bir kúnde kelip jetkendeı áser qaldyrady.
Tek toı sońynan taǵylymdy iz qalyp, sanaǵa tıer oı jınalsa bolǵany.
Keń dalada mýzykalyq jáne ádebı shyǵarmalar, teatrlandyrylǵan qoıylymdar, aqyndar saıysy, salt-dástúrler, jarystar baǵdarlamalary ótedi, «Súıinbaı sazy» folklorlyq-etnografııalyq ansambli, «Ertis-Baıan áýenderi» oblystyń shyǵarmashylyq ujymdarynyń konsert beredi.
Farıda BYQAI,
«Egemen Qazaqstan»
Pavlodar
Sýretti túsirgen: Valerıı Býgaev
