«Qazaqstannyń kólik júıesi - shyn máninde memlekettiligimizdiń negizi. Bul halqymyzdyń áleýmettik-ekonomıkalyq jaǵdaıy men órkendeýine tikeleı áser etetin ekonomıkanyń kúretamyry. Sońǵy jyldary ulttyq básekege qabilettilik pen turaqty ósý faktory retinde kóliktiń mańyzdylyǵy birden artty. Máselen, 2015 jyldan bastap elimizdiń jalpy ishki ónimindegi salanyń úlesi keminde 8% qurap keldi. Sońǵy 10 jylda ınfraqurylymdy, kólik-logıstıkalyq aktıvterdi damytýǵa salynǵan jalpy ınvestısııa kólemi shamamen 30 mlrd AQSh dollaryn qurady. Osy kezeńde 2 myń shaqyrymnan astam temir jol salyndy, 6,3 myń shaqyrym jol rekonstrýksııalandy, Kaspıı teńizindegi porttyq qýat 23,5 mln tonnaǵa deıin artty, 15 áýejaıda qaıta jańartý jumystary júrgizildi», - dep jazdy ol Feısbýktegi paraqshasynda. Mınıstrdiń aııýynsha, ınfraqurylym salasyndaǵy qarqyndy qurylys tıisti halyqaralyq reıtıngterdegi Qazaqstannyń kórsetkishterine oń áserin tıgizgen.
«Búgingi tańda Qazaqstan Eýropa men Azııa arasyndaǵy negizgi qurlyqtyq tranzıtteýshi el retinde bazalyq ınfraqurylym jaǵdaılaryn ekonomıkanyń joǵary kiris kózi retinde qurdy. Munda kólik salasyndaǵy árbir qyzmetkerdiń eren eńbegi bar ekenin aıtqym keledi. Barlyq qyzmetkerler men ardagerlerge, temirjolshylarǵa, avtomobılshilerge, áýe jáne sý kóligi qyzmetkerlerine, logıstıkalyq qyzmet mamandaryna laıyqty eńbekteri men óz jumystaryna adaldyqtary úshin alǵys aıtamyn», - dep atap ótedi Jeńis Qasymbek. Aıta keteıik, «Qazaqstan Respýblıkasyndaǵy merekelik kúnderdiń tizbesin bekitý týraly» QR Úkimetiniń qaýlysyna sáıkes tamyzdyń birinshi jeksenbisinde kólik qyzmetkerleri kúni atalyp ótkiziledi.
