Búginde 800 mıllıonǵa jýyq aýdıtorııasy bar basylym 130 jylda 12 myńnan astam grant bólip, mańyzdy ǵylymı-zertteý jumystaryn júrgizip keledi. Jýrnal álemniń 38 tilinde shyǵarylyp, 80 elge taraıdy. Orta Azııada birinshi bolyp Qazaqstanda 2016 jyly jaryq kórip, memlekettik tilde taralatyn tuńǵysh sheteldik basylym bolyp tabylady.
Aımaq basshysy Qumar Aqsaqalovtyń usynysymen óńirge kelgen «National Geographic Qazastan» halyqaralyq jýrnalynyń basshylyǵy BAQ ókilderimen kezdesýde ekspedısııalyq top quryp, tarıhı-mádenı oryndardy, kórikti jerlerdi aralaıtyndaryn, ekologııalyq máselelerdi, jan-janýarlar dúnıesin zertteıtinderin, alaıda basty baǵdar týrızmdi nasıhattaý bolyp qala beretinin jetkizdi.
«Shyǵarmashylyq top teriskeıge birinshi ret kelip otyrǵanyna qaramastan iske birden kirisip ketti. Fotosýretter men beınetúsirilimderdi jınaqtap, aǵylshyn tilinde túrli-tústi jınaq shyǵarýdy josparlap otyrmyz. Ondaǵy maqsat–Shalqar, Imantaý sııaqty aımaqtyń qaıtalanbas sulý tabıǵaty men Botaı mádenıeti, Aıǵanym qonysy sekildi tarıhı oryndarǵa sheteldikterdiń nazaryn aýdartý. Toptyń quramynda Italııadan arnaıy shaqyrtylǵan óte tájirıbeli fotograf Alberto de Maýro bar»,dedi ekspedısııa jetekshisi Dáýren Qudaıbergen aldaǵy is-sharalarmen bólisip. Ekspedısııa qorytyndysy boıynsha arnaıy kórme uıymdastyrylyp, sýretter Qazaqstan men Reseı arasynda ótetin óńiraralyq forýmǵa da usynylatyn bolady. Býkletter jasalyp, jurtshylyqqa taratylmaq.
Oblys ákiminiń orynbasary Dáýren Jandarbektiń aıtýynsha óńirde tabıǵaty ásem, kórikti jerler kóp bolǵanymen, olardy nasıhattaý, tanystyrý jaǵy kemshin. Endi osy olqylyqtyń ornyn toltyrýǵa on adamnan quralǵan ekspedısııa súbeli úles qosyp, týrıstik áleýetimizdi sheteldikterge keńinen tanytady degen senimde.
Top músheleri 14 kúnde birjarym myń shaqyrym jerdi júrip ótip, jıyrmadan astam tarıhı nysandardy aralamaq.
О́mir ESQALI,
«Egemen Qazaqstan»
Soltústik Qazaqstan oblysy
