Elimizde sońǵy jyldarda quqyqtyq daýlardy sotqa deıin, ıaǵnı daý-damaılardy azamattardyń quqyǵy men bostandyǵyna zalal keltirmeı, álemde qalyptasqan tájirıbeler deńgeıinde sheshý óz ómirsheńdigin dáleldedi. 2011 jyly «Medıasııa týraly» Zań qabyldandy. Zań aıasynda jeke jáne zańdy tulǵalardyń qatysýymen azamattyq, eńbek, otbasylyq jáne basqa da quqyqtyq qatynastardan týyndaıtyn daýlardy, sondaı-aq aýyr emes dárejedegi qylmystyq ister boıynsha sot óndirisi jolǵa qoıyldy.
Almaty qalalyq jáne aýdandyq sottardyń, prokýratýra organdarynyń, kásipodaq salasy qyzmetkerleri, medıasııa ortalyqtarynyń, Qazaqstan halqy Assambleıasy qurylymdarynyń ókilderi bas qosqan shara aıasynda respýblıka azamattary arasynda tatýlyq pen turaqtylyqty saqtaýmen qatar medıasııanyń damýyna qatysty kóptegen mańyzdy máseleler talqylandy.
Is-sharanyń moderatory D.A.Qonaev atyndaǵy Eýrazııalyq zań akademııasy QHA kafedrasynyń meńgerýshisi B.Battalhanov Qazaqstan medıasııasynyń tarıhyna qysqasha sholý jasap, medıatıvtik kelisimderdi jasaýdyń barysyna toqtalyp ótti.
Otandyq medıasııany damytýda elimizdegi etnostararalyq qarym-qatynastardyń úlesi zor ekendigin atap ótken Almaty qalasy QHA tóraǵasynyń orynbasary K.Mamsýrov Qazaqstan halqy Assambleıasy elimizdegi negizi medıator retinde tatýlyq pen dostyq qatynastardyń úılesimdi bolýyna barynsha yqpal etýde. K.Mamsýrovtyń aıtýynsha, medıasııa qyzmeti alǵash qoldanysqa engen jyldarda daýlardyń bir paıyzy ǵana sheshimin tapsa, búginde bul kórsetkish áldeqaıda ósken. Almaty qalasy QHA aıasynda kásiporyndar, oqý oryndarynda, t.b. mekemelerde jıi kezdesýler ótkizilip, túsindirý jumystary turaqty júrgizilip keledi.
Almaty qalasy boıynsha Qazaqstan halqy Assambleıasy hatshylyǵynyń meńgerýshisi N.Balǵymbaevtyń aıtýynsha, elimizde qurylǵan Medısııa ortalyǵynyń mindeti qoǵamdyq kelisimderdi órkenıetti turǵyda sheshýge negizdelgen. Bul baǵytta Qazaqstan halqy Assambleıasyna zor jaýapkershilikter júktelip otyr. Adam resýrstaryna qamqorlyq jasaý, qorǵaý baǵytynda quqyqtyq saýattylyqty arttyrý, sandyq tehnologııalardy engize otyryp kórsetiletin qyzmetter aıasyn keńeıtý sııaqty qoǵamdyq máselelerdi jeńildetýdiń kóptegen baǵyttary jumys isteýde. Medıasııanyń ádeptilik turǵysyndaǵy máselelerdi sheshýdegi úlesi zor. Osy oraıda Dostyq úıinde QR Prezıdenti janyndaǵy «Qoǵamdyq kelisim» RMM Medıasııalyq ádistemelik kabınetindegi kásibı medıatorlar tarapynan ótken jyly 130, onyń ishinde 32 azamattyq, 31 qylmystyq, 49 ákimshilik, al bıylǵy jyldyń alǵashqy jartyjyldyǵynda 29 istiń oń sheshimin tabýyna quqyqtyq negizde keńester berilgen. Al kelesi jyly medıasııa qyzmetin jetildirýge baılanysty Almaty qalasy ákimi apparaty «Qoǵamdyq kelisim» janynan vırtýaldy menedjer kabınetin ashý josparlanýda. Elimizdegi medıasııanyń ulttar arasyndaǵy tatýlyqty nyǵaıtýdaǵy erekshelikterin atap ótken «Ahysqa» respýblıkalyq túrik etnomádenı ortalyǵy jetekshisiniń orynbasary Sh.Asıev jáne t.b. baıandamashylar zamanaýı úlgidegi medıasııanyń mańyzdylyǵyna toqtalsa, BAQ ókilderine arnalǵan sheberlik saǵattary aıasynda medıasııa úrdisiniń erekshelikteri túsindirildi.
Is-sharada sondaı-aq eńbek, zań jáne basqa daýlarǵa qatysty týyndaıtyn máselelerge oraı qala turǵyndaryna keńester berildi.
Elvıra SERIKQYZY,
«Egemen Qazaqstan»
