Marapattaý rásimine Syrtqy ister mınıstri Qaırat Ábdirahmanov, Qazaqstan Bas redaktorlar klýbynyń prezıdenti Erlan Bekhojın jáne baıqaý seriktesteri men jeńimpaz jýrnalıster elderiniń Astanadaǵy dıplomatııalyq ókilderi qatysty. Jyl saıyn ótetin baıqaýǵa sheteldik baq ókilderi qatysýy artyp keledi. Bıyl 20-dan astam elden 80-nen astam ótinim kelip túsip, olardyń arasynan bes qurlyq ókilderi jeńimpaz atandy. Olar óz jumystarynda qazaqstandyq bolmystyń túrli aspektilerin ashyp kórsetip, shyǵarmashylyq jáne obektıvti turǵyda baıandaýǵa tyrysqan. Jalpy baıqaý uıymdastyrylǵan jyldar ishinde sheteldik buqaralyq aqparat quraldary ókilderiniń Qazaqstannyń mádenıetine, ekonomıkasy men halqynyń ómirine degen qyzyǵýshylyǵy artqanyn baıqaýǵa bolady. Ońtústik jáne Soltústik Amerıka, Eýropa, TMD jáne Baltyq elderi, Taıaý Shyǵys jáne Afrıka, Azııa, Avstralııa jáne Okeanııa elderi bolyp jiktelgen óńirlerden kelip túsken jumystar arasynan tańdalǵan bes jeńimpaz bas júlde – Qazaqstanǵa kelýge joldamany jeńip aldy. Rásim barysynda sóz alǵan Syrtqy ister mınıstri Qaırat Ábdirahmanovtyń aıtýynsha, tek Astana taqyryby boıynsha sheteldik basylymdarda 300-ge jýyq maqala jarııalanǵan. «Bıyl Astananyń 20 jyldyq mereıtoıy týraly sheteldik baspasóz betterinde 300-ge jýyq maqala jaryq kórdi. Olardyń basym bóligi Astanaǵa arnaıy saparlap kelgen jýrnalısterdiń eksklıýzıv maqalalary», dedi mınıstr jeńimpazdardy marapattaý barysynda. Odan bólek, baıqaýǵa reseılik, grýzııalyq, ázerbaıjan jýrnalısteriniń úzdik maqalalary kelip tústi. О́kinishke oraı, barlyǵyn birdeı marapattaı almaımyz, degenmen sheteldik baspasózderde jaryq kórgen árbir maqala úlken eńbektiń jemisi, ári biz úshin óte baǵaly. Sondyqtan, bul baıqaý óz jalǵasyn tabady dep oılaımyn».
TMD jáne Baltyq elderi avtorlarynyń arasynan 2017-2018 jyldar ishinde Qazaqstan men О́zbekstan arasyndaǵy dıplomatııalyq qarym-qatynastyń 25 jyldyǵyna arnalǵan maqalalar serııasynda eki el qarym-qatynasyn belsendi jarııalaǵany úshin О́zbekstan Ulttyq aqparat agenttiginiń (О́zA) tilshisi Ulyqbek Shonazarov jeńimpaz atandy. Al Eýropa jýrnalısteri arasynan brıtandyq Djıllı Pıkaptyń Qazaqstanǵa saıahaty týraly «Country and Townhouse» jýrnalynda jaryq kórgen «One Steppe Beyond» atty maqalasy arqyly úzdikter qatarynan tabyldy. Amerıkalyq Aleksandr Lıpovsev pen Stefan Rabımovtyń «Forbes» jýrnalyna shyqqan «Qazaqstannyń bes ǵajaıyby: Ortalyq Azııada nelikten sán týrızmi jedel damýda» atty maqalasy Amerıka qurlyǵynyń jýrnalısteri arasyndaǵy eń úzdik maqala bolyp tanyldy. Al Taıaý Shyǵys pen Afrıka elderiniń jýrnalısteri arasynan Qazaqstannyń damýyna, syrtqy saıasatyna jáne Astananyń 20 jyldyǵyna arnalǵan sapaly materıaldar serııasy úshin ıordanııalyq Aıman Abdelhafez az-Zaben jeńimpaz atandy. «Business Central Asia» jýrnalynda jarııalanǵan úndistandyq Indervır Sınghtiń «Astana: the capital has it's own charms and pleasures» atty jarııalanymy Azııa, Aýstralııa jáne Okeanııa elderinen kelip túsken maqalalar arasynan qara úzip shyqty. Onda qalanyń ósýi týraly statıstıkalyq maǵlumattar keltirile Astananyń sáýleti sýrettelip, qaladaǵy ǵımarattar men qurylymdardyń qysqasha tarıhy jazylǵan. Jeńimpaz atanǵan bes jýrnalıst Astana, Almaty qalalaryna jáne Býrabaı kýrorttyq-demalys aımaǵyna saparlap jáne Qazaqstannyń mádenı-tarıhı nysandarymen tanysyp, Qazaqstannyń laýazymdy tulǵalarymen, sarapshylarmen, jýrnalıstermen, mádenıet, sport, týrızm salasynyń ókilderimen suhbattasý múmkindigine ıe boldy.
Venera Túgelbaı,
«Egemen Qazaqstan»
