Baqytjan Jumaǵulov «7–20–25» baǵdarlamasyn iske asyrý aıasynda Syrdarııa ózeniniń sol jaǵalaýyndaǵy turǵyn úı qurylysy jumystarynyń qalaı oryndalyp jatqanyn kórdi. 2017 jyldyń qarashasynda bastalǵan «Qaraózek» joǵary tehnologııalyq gazdy kompressorlyq stansasynyń qurylysymen jáne osy jyldyń sáýir aıynda ashylǵan «Q-med» klınıkasynyń jumysymen tanysty. «Elektrotehnologııa» JShS oqý ortalyǵy men «Bolashaq» ýnıversıtetinde boldy.
Dostyq úıinde oblys ákimi Qyrymbek Kósherbaev, respýblıkalyq qoǵamdyq keńestiń tóraǵasy Baqytjan Jumaǵulov, «Nur Otan» partııasynyń hatshysy Farhad Qýanǵanov jáne tıisti memlekettik organdar ókilderiniń, saıası partııa jáne qoǵam belsendileriniń qatysýymen Memleket basshysynyń bes áleýmettik bastamasyn Qyzylorda oblysynda júzege asyrý boıynsha keńes bolyp ótti.
Oblys ákimi Qyrymbek Kósherbaev Memleket basshysy tapsyrmasynyń aımaqta iske asý barysy týraly baıandama jasady. Aımaq basshysy shaǵyn jáne orta kásipkerlikti qoldaý men mıkrokredıtter sanynyń ulǵaıýy arqyly aǵymdaǵy jyldyń 6 aıynyń ishinde ózin ózi tıimsiz jumyspen qamtyǵan jáne jumyssyz 97538 adamnyń 27 myńnan astamy jumysqa ornalastyrylǵanyn aıtty.
– Sońǵy eki jyldyń kóleminde oblys boıynsha memlekettik qarajat pen jeke qurylys salýshylardyń esebinen 500 myń sharshy metrge jýyq turǵyn úı paıdalanýǵa berildi. 2017 jyly apatty turǵyn úılerdiń máselesin tolyqtaı sheshtik. Bul jumysty 2013 jyly bastadyq. Sodan beri apatty úıde turyp jatqan 500-den asa turǵyndy jaıly da jańa baspanamen qamtamasyz ettik. Qyzylorda oblysynyń aýmaǵynda 1726 páterdi quraıtyn 42 kóp qabatty turǵyn úıdiń qurylysy júrip jatyr. Biz 2018 jyldy «Jappaı kásipkerlikti damytý jyly» dep jarııaladyq. Osy maqsatta keshendi «Jol kartasyn» ázirledik. Ony iske asyrýǵa jalpy esebi 32 mlrd teńge bólýdi josparlap otyrmyz. Onyń ishinde 3 mlrd teńge startap jobalarǵa bólinedi, dedi ákim.
Kezdesýdi qorytyndylaǵan áleýmettik bastamalardy iske asyrý jónindegi keńestiń tóraǵasy B.Jumaǵulov óńirde atqarylǵan jumystardy jaqsy baǵalaıtyndyǵyn aıtty.
– Syrdarııanyń sol jaǵalaýyndaǵy jańa qalanyń salynýyna oraı bul baǵdarlama turǵyndar úshin tıimdi bolar degen oıdamyn. Sondaı-aq bul turǵyda «Orda» baǵdarlamasy bekitilip, sátti tájirıbe júzege asyrylyp jatyr eken. Bul nesıe alýshylardyń aıasyn keńeıtýge jáne atalǵan bastamany sátti iske asyrýǵa septigin tıgizetini anyq. Mundaı bastama ázirge tek Almaty men Qyzylorda oblysynda bar. Mundaı tájirıbeni ózge de oblystarǵa da taratý kerek dep esepteımin, – dedi «Prezıdenttiń bes áleýmettik bastamasyn» baqylaý jónindegi respýblıkalyq qoǵamdyq keńestiń tóraǵasy.
Baqtııar TAIJAN,
«Egemen Qazaqstan»
