Jýyrda Prezıdenttiń «bes áleýmettik bastamasy» atty halyqqa Úndeýindegi «Árbir otbasyna baspana alýdyń jańa múmkindikterin berý» tapsyrmasy aıasynda mańǵystaýlyq bıýdjet salasy qyzmetkerleriniń kózaıym qýanyshyna aınalǵan jańalyq Munaıly aýdanynyń Mańǵystaý aýylynda júzege asty. Jalpy, qurylys alańy shamamen 2,5 myń sharshy metrdi quraıtyn aýmaqta eki ǵımarattan turatyn júz oryndyq jataqhana salynyp, onyń jan-jaǵy abattandyryldy, jasyl jelek jamylǵan alańda jaıaý júrginshiler jolyna asfalt pen kespe tastar tóseldi.
Quny 840 mıllıon teńge turatyn jataqhana «NKOK» kompanııasynyń mańyzdy áleýmettik jáne ınfraqurylymdyq jobalary sheńberinde júzege asyryldy. Qurylys jumystary bir jylǵa jeter-jetpes merzim ishinde aıaqtalǵan jataqhanada as úı, jýynatyn bólme, kireberis jáne zat saqtaıtyn qoımamen qatar turmysqa qajetti zattardyń barlyǵy bar.
– Kompanııa 2017-2018 jyldar aralyǵynda Mańǵystaý aýylyna kitaphanasymen birge 500 oryndyq mádenıet úıi, Mańǵystaý aýylynda 160 oryndyq dene shynyqtyrý-saýyqtyrý kesheniniń qurylysy men Mańǵystaý-5 eldi mekeninen 15 shaqyrym avtokólik jolynyń qurylysyna 3 mıllıard teńgeden astam qarajat bólip, Munaıly aýdanynyń áleýmettik damýyna óz úlesterin qosýda, – dedi E.Toǵjanov. Aımaq basshysy óz kezeginde «NKOK» kompanııasynyń jumysyna da oń baǵa bere ketti.
– Konsorsıým mindeti – jergilikti jurtshylyqtyń qajettilikterin tikeleı qamtý. Sonymen qatar konsorsıým bul aımaqtarda áleýmettik jobalarǵa úlken qajettilik bar ekenin eskere otyryp, Mańǵystaý jáne Atyraý oblystarynda birqatar qosymsha jobany júzege asyrýda, deıdi «NKOK» kompanııasynyń basqarýshy dırektory Brýno Jarden.
Qyrkúıek aıynda Munaıly aýdanynyń Qyzyltóbe jáne Basqudyq aýyldarynda mektep ashylady dep josparlanýda.
Gúlaıym ShYNTEMIRQYZY,
«Egemen Qazaqstan»
