«Astana» klýby úshinshi irikteý kezeńinde Danııa chempıony «Mıdtıýlland» klýbyna qarsy oınap, eki oıyn qorytyndysy boıynsha (1:2) úshinshi irikteý satysyna shyqqan bolatyn. Danııanyń Hernıng qalasynda ótken qarymta kezdesýde birinshi mınýttan bastap shabýyl shebinde kongolyq shabýylshy Jýnıor Kabananga oınady. Astanadaǵy alǵashqy matchta Roman Murtazaev shyqqan-dy. «Astana» komandasynyń bas jattyqtyrýshysy Roman Grıgorchýk qarymta matchta osyndaı ózgeris jasady. Qarsylas komanda sapynda da ótken oıynmen salystyrǵanda bir oıynshy ǵana ózgergen eken. Eki komanda quramynda azdaǵan ózgeris bolǵanymen, oıyn dál birinshi kezdesýdegideı ótti.
«Men búgingi oıynda tyń ózgeristerdiń bolýy múmkin ekendigin bilgen edim. Eger shyndyǵyna keler bolsaq, Danııa chempıonatyndaǵy qarsylastardyń oıynyn kórip, qarymta kezdesýge shyǵatyn quramyn dál taptym. Keshegi oıyn Astanadaǵy kezdesýmen salystyrǵanda aıtarlyqtaı erekshe boldy deı almaımyn. Múmkin, jankúıerlerdiń qyzý qoldaýy kezdesý barysyna basqasha atmosfera bergen bolar», deıdi Roman Grıgorchýk.
Komandalar kezdesýdiń alǵashqy mınýtynan-aq gol soǵýdyń qamyna kirisip, oıyndy belsendi bastady. Ásirese alań ıeleri jyldam gol soǵýǵa tyrysyp baqty. Degenmen «Astana» qorǵanysy syr bermeı, qaýipti shabýyldardyń betin qaıtaryp jatty. Oraıy kelgende qaqpashy Erıch te alys-jaqynnan baǵyttalǵan soqqylardy dál ańdap, Danııa komandasynyń shabýylshylaryn aıyp alańyna attap bastyrmady. Grıgorchýktiń shákirtteri de jıi shabýyldap, Hansenniń mazasyn ábden qashyrǵan. Sondaı sátterdiń birinde, naqtylaı tússek, 19-mınýtta Kabananga gol soqty. Alaıda ıspanııalyq tóreshi Hýan Martınes bul goldy eseptemeı tastady. 95 mınýtqa sozylǵan oıynda esep ashylmaı, Astanadaǵy alǵashqy kezdesýde 2:1 esebimen jeńiske jetken elordanyń «Astana» komandasy Chempıondar lıgasynyń úshinshi kezeńine joldama aldy.
Al osy kezeńde «Astanaǵa» qarsylas atanyp otyrǵan Horvatııa Birinshi lıgasynyń chempıony «Dınamo» Chempıondar lıgasyndaǵy joryǵyn ekinshi irikteýden bastady. 2000 jyldan beri Eýrokýbok oıyndaryna qatysyp kele jatqan komanda Izraıldiń «Hapoel» klýbyn eki matchtyń qorytyndysy boıynsha 7:2 esebimen tas-talqan etip jeńdi. Horvattar óz alańynda 5:0 nátıjesimen basym tússe, syrt alańdaǵy qarymta kezdesýde 2:2 esebimen teń oınady.
«Dınamo» Horvatııanyń qazirgi tańdaǵy eń myqty ujymdarynyń biri sanalady. Negizi 1945 jyly qalanyp, tamyry keńge jaıylǵan komanda bedeli bes qurlyqqa taraǵan birneshe talantty fýtbolshyny tárbıelep shyǵarǵan. Ańyz fýtbolshylardyń arysy Zlatko Kranchar, Borıslav Svetkovıchtermen bastalyp, qazirgi tańda ulttyq quramada jasyndaı jarqyldap júrgen Lýka Modrıch, Vedran Chorlýka, Mateo Kovachıch, Deıan Lovren, Domagoı Vıda jáne taǵy basqa aıaqdop sheberlerimen kete beredi. Osyndaı talanttardyń baǵyn asha bilgen komanda ishki chempıonattyń 18 dúrkin chempıony sanalady. Tipti, 2005 jyldan 2015 jylǵa deıingi 10 jyldyqta uzaq ýaqyt «bılep-tóstep», birinshi oryndy eshkimge bermeı kelgen «erligi» bar.
Sońǵy 20 jyl kóleminde Eýrododalarda jyl saıyn baq synap júrgen «Dınamo» osy ýaqyt aralyǵynda Eýropanyń birqatar azýly komandalarymen oınap, tájirıbe jınaqtap aldy. Dese de bizdiń «Astana» klýby bul komandanyń aldynda qarajaıaý emes. Nebári 9 jyldyq tarıhy bolsa da, sońǵy 4-5 jylda Eýropany dúr silkindirgeni eshkimge jasyryn emes. Bul sózimizge byltyr Eýropa lıgasynyń toptyq kezeńinen ótip, pleı-off satysyna deıin jetkeni aıqyn dálel bola alady.
Al eki komandanyń dál qazirgi jaǵdaıy men múmkinshiligi qaı dárejede degen suraqqa jaýap berer bolsaq, oıyn tájirıbesi boıynsha «Astana» birshama basymdyqqa ıe. Sebebi Horvatııa chempıonatynyń ekinshi týr oıyndary oınalsa, Qazaqstan birinshiliginiń ekinshi aınalymy aıaqtaldy. Sózimiz dáleldi hám dáıekti bolý úshin osy oraıda mynadaı bir statıstıkany sóıletip jibersek. «Dınamo» komandasy qatarynan 13 oıynda jeńilgen joq. Degenmen, onyń jeteýi joldastyq kezdesý ekenin eskersek, resmı matchtyń ekeýinde teń túsip, tórteýinde jeńiske jetken. Elordanyń «Astana» komandasy bolsa, qatarynan 12 oıynda jeńilistiń ne ekenin bilmeı kele jatyr. 10 matchta qarsylastarynan basym tússe, eki kezdesýde jeńimpaz komandanyń aty anyqtalmady. Eki komanda arasyndaǵy qysqasha statıstıka osyndaı.
«Dınamo» fýtbolshylary keshe túnde elimizge taban tiredi. Komanda bas jattyqtyrýshysynyń aıtýynsha, klýb Qazaqstanǵa jaqsy kóńil kúımen kelgen, tek bir fýtbolshy ǵana jaraqatyna baılanysty Zagrebte qalǵan. «Bizdiń maqsatymyz – Chempıondar lıgasynyń toptyq kezeńine shyǵý. Ol bizdiń ornymyz. Menińshe, sol nátıjege osy oıynda qol jetkizemiz. «Astanany» «Hapoel Beer-Shava» komandasymen salystyrar bolsam, Qazaqstannyń komandasy shabýylda osaldyq tanytqanymen, tasqamal qorǵaýshylary bar. Olardyń bizge múmkindik bermeıtini anyq. Sondaı-aq «Astananyń» qaptaldaǵy fýtbolshylarymen ortalyq jartylaı qorǵaýshylarynan da saqtanýymyz kerek», deıdi Nenad Belısa.
«Astana» óz alańynda jaqsy oınaıtynyn jáne «Astana Arena» stadıonynda kóp jeńile bermeıtinin eskersek, búgingi oıynda da jeńiske jetýge múmkindik bar. Búgingi matchta «Astanaǵa» qoıylatyn negizgi talaptyń biri – qarsylas komanda qaqpasyna meıilinshe kóp gol soǵyp, óz qaqpamyzǵa gol jibermeý. Eger osy talap júzege asatyn bolsa, «Astana» kelesi kezeńge ótýi bek múmkin.
Álı BITО́RE,
«Egemen Qazaqstan»
