«Aq saraı» degen ataýǵa ıe bolǵan jańa neke saraıynyń saltanatty ashylýyna Qaraǵandy oblysynyń ákimi Erlan Qoshanov ta qatysty. О́ńir basshysy AHAT bóliminiń jumysymen tanysyp, dál sol kezde saltanat zalynda tirkeýden ótip jatqan jas jubaılardyń, altyn jáne kúmis toı ıeleriniń qýanyshtaryna ortaqtasty.
– Qaraǵandylyqtarǵa dál osyndaı saraıdyń kerektigi kópten beri belgili bolatyn. Muny qalaǵa jasalǵan syı dep qana túsinbeý kerek. Bul patrıottyqtyń jáne mesenattyqtyń, eren eńbektiń jarqyn úlgisi. Elimizdiń ár turǵyny, ár kásipkeri «Rýhanı jańǵyrý» baǵdarlamasyn júzege asyrýǵa qatysýy óte mańyzdy, – dep atap ótti óńir basshysy.
Buǵan deıin Qaraǵandydaǵy neke saraıy eski jáne tar ǵımaratta ornalasqan-dy. Endi AHAT qyzmetkerleri keń de samaladaı jaryq, jaıly jerde jumys isteıtindikterine qýanyshty ekendikterin aıtady. Bul jerde shilde aıynyń ózinde 500-den astam tirkeý aktileri júzege asyrylǵan eken.
Jalpy, meıramhana jáne qonaq úı kesheni retinde salynǵan jańa ǵımarattyń aýmaǵy 16,5 myń sharshy metrdi quraıdy. Joba quny 3 mlrd teńge turady.
«Aq saraıdyń» boı kótergen jeri de nekege otyrýshy jas jubaılar úshin óte qolaıly.Jańa ǵımarat qalanyń qaq tórine salynǵan ári dál janynda Ánet baba atyndaǵy ortalyq meshit oryn tepken.
Qaırat ÁBILDA,
«Egemen Qazaqstan»
