Qazirgi kezde 3–6 jastaǵy balalardy mektepke deıingi bilim berýmen qamtý 93%-dy quraıdy. Osy jyldan bastap 25 qala men 6 aýdanda balabaqshalarǵa elektrondy túrde joldama berý iske qosyldy. Jyl sońyna deıin barlyq oblystar atalǵan júıege kóshedi.
Elektrondy úkimet pen «E-ákimdiktiń» ıntegrasııasy arqyly joldama berý prosesi avtomattandy.
Orta bilim berýde jańartylǵan mazmunǵa kóshý jalǵasýda. О́tken jyldan bastap 1, 2, 5, 7-shi synyptar jańa oqý baǵdarlamasy men oqýlyqtar negizinde bilim alyp jatyr.
Qyrkúıekten bastap 3, 6, 8-shi synyptar jańartylǵan mazmun boıynsha oqýǵa kóshedi.
«Osy jyldyń sońyna deıin balalardyń 75%-y jańartylǵan bilim berý mazmuny boıynsha oqıdy, eki jylda shamamen 150 myń muǵalim jańartylǵan baǵdarlamalar boıynsha kýrstardan ótti», — dedi E. Saǵadıev.
Bıyl taǵy 73 myń pedagog oqyp jatyr. Memleket basshysynyń tapsyrmasyna sáıkes jańartylǵan mazmun boıynsha sabaq beretin 205 myń (67%) muǵalimniń jalaqysy 30%-ǵa kóbeıdi. Pedagogtardy attestattaýdyń jańa júıesi engizildi. Attestasııalaýǵa 60 myńǵa jýyq pedagog qatysty, olardyń ishinen 36 myńnan astamy attestasııadan ótti (63%).
Mınıstrdiń aıtýynsha, jan basyna qarjylandyrý normatıvi bekitildi. Ol Astana qalasynda tolyǵymen 74 memlekettik jáne 11 jekemenshik mektepte bıyl 1 qyrkúıekten bastalady. Sonymen qatar, atalǵan jumys Shymkent qalasynda da bastaldy.
Bilim jáne ǵylym mınıstrliginiń derekterine sáıkes, respýblıkalyq bıýdjet esebinen jyl saıyn 110-nan 170-ke deıin mektep salynady.
Tehnıkalyq jáne kásiptik bilim berý salasynda, Elbasynyń tapsyrmalaryna sáıkes, memlekettik bilim berý standarttary tolyǵymen jańartyldy jáne barlyq mamandyqtar boıynsha 245 modýldik baǵdarlamalar ázirlendi. Kolledjderge baǵdarlama mazmunyn jumys berýshiniń talaby boıynsha 50%-ǵa deıin jáne qosarly bilim berý kezinde 80%-ǵa deıin ózgertýge múmkindik berildi.
Halyqaralyq talaptarǵa, sonyń ishinde WorldSkills standarttaryna sáıkes jańa bilim berý baǵdarlamalaryna kezeń-kezeńimen kóship jatyrmyz. Qazirgi tańda 170-ten astam jańartylǵan baǵdarlamalar daıyn, jyl sońyna deıin taǵy 70 baǵdarlama daıyn bolady.
Bilim berý vedomstvosy basshysynyń aıtýynsha, erekshe bilim berý qajettiligi bar adamdarǵa tehnıkalyq jáne kásiptik bilimge erkin qol jetkizý boıynsha jol kartasynyń jobasy ázirlendi.
Joǵary jáne joǵary oqý ornynan keıingi bilim berýde jumys básekege qabiletti kadrlardy daıyndaýǵa, bilim, ǵylym jáne ınnovasııany ıntegrasııalaýǵa baǵyttalǵan. Memlekettik JOO-lardyń rektorlaryn taǵaıyndaý kezinde ashyqtyq pen basty talaptar saqtalýda. Ashyq konkýrs arqyly 19 rektor taǵaıyndaldy. Álemniń úzdik ýnıversıtetteriniń QS WUR reıtıngisine 2018 jyly 10 qazaqstandyq JOO endi.
Prezıdenttiń Bes áleýmettik bastamasyn iske asyrý aıasynda bıyl memlekettik tapsyrys kólemi 20 myń orynǵa artty. 2022 jylǵa deıin stýdentter jataqhanalarynda 75 myń oryn ázirleý josparlanǵan. Búginde ákimdikter 140 jer teliminiń bar ekenin rastady.
«2018–2020 jyldarǵa arnalǵan ǵylymı-zertteý jumystary ǵylymdy damytatyn jeti basymdyq aıasynda oryndalýda. ǴZTKJ-dy qarjylandyrýdyń jalpy kóleminde tájirıbelik-konstrýktorlyq jumystarǵa arnalǵan shyǵyndar úlesi 25%-ǵa jýyq qurady, jospar boıynsha 22% bolǵan. 2018–2020 jyldary granttyq qarjylandyrý boıynsha 1 myńnan astam ǵylymı joba jáne ǵylymdy nysanaly qarjylandyrý boıynsha 92 baǵdarlamanyń oryndalýy bastaldy», — dep túıindedi E. Saǵadıev.
Bilim berýdi jáne ǵylymdy damytýdyń memlekettik baǵdarlamasyn iske asyrý máselesin qaraý barysynda Almaty oblysynyń ákimi A. Batalov, Pavlodar oblysynyń ákimi B. Baqaýov, Mańǵystaý oblysynyń ákimi E. Toǵjanov baıandama jasady.
