«Nólinshi synyptarǵa qabyldaný úshin eshqandaı emtıhandar tapsyrý qajet emes. Eger bala 5 jasqa tolsa jáne oqýǵa qulshynysy bolsa, onda bilim alý úshin eshqandaı de kedergi bolmaýy kerek», — dedi A. Aımaǵambetov.
Vıse-mınıstr nólinshi synyptarǵa qabyldaý kezinde ózekti bolyp otyrǵan másele — usynylatyn qujattar paketi ekenin aıtty, munda keıde zańsyz túrde ata-analardyń jumys ornynan anyqtamalar suraıtyn jaǵdaılar da oryn alýda.
«Mektepterdiń negizsiz túrde jumys ornynan suratatyn anyqtamalary – zańsyz. Qandaı qujattar qajet ekeni týraly naqty jazylǵan standart bar, onda jumys ornynan talap etiletin anyqtama týraly jazylmaǵan», — dep túsindirdi QR BǴM ókili.
Sondaı-aq, jýrnalısterdiń suraqtaryna jaýap bere otyryp, vıse-mınıstr mınıstrlik mektepterge oqýshylardy qabyldaýdyń jańa tıptik erejeleri bekitilgenin aıtty.
«Búginde keıbir mektepterde áli kúnge deıin oqýshylar sany shamadan tys. Qazaqstan boıynsha 118 mektep úsh aýysymda sabaq beredi. Ásirese, elorda mektepterine oqýshylardy qabyldaý máselesi ózekti bolyp otyr, munda jyl saıyn birinshi synyp oqýshylarynyń sany 15 myń balaǵa ulǵaıýda», — dedi ol.
Sonymen qatar, A. Aımaǵambetov UBT men keshendi testileýdi biriktirýdiń yqtımal keleshegi týraly aıtyp berdi.
«2017 jylǵa deıin UBT eki fýnksııany atqardy – mekteptegi oqýdy aıaqtaıtyn qorytyndy emtıhan jáne joǵary oqý oryndaryna túsý emtıhany. Búginde UBT eki bólikke bólingennen keıin, bala attestat alý úshin mektepte emtıhan tapsyrady jáne budan bólek Biryńǵaı ulttyq testileýden ótedi. KT da osyndaı fýnksııa atqarady, alaıda 2 aptadan keıin ótedi. Eger eki test te birdeı fýnksııany atqarsa jáne olarǵa bir adamdar qatysa alatyn bolsa, aldaǵy ýaqytta keshendi testileýdi ótkizýdiń qajettigi joq deýge bolady.
Bul memleket úshin óte úlken shyǵyn, óıtkeni biz komıssııany bir ret jiberip, keıin qaıta jiberýimiz kerek. Bul belgili bir kúshterdi, aýdıtorııany jáne t.b. jumyldyrýdy qajet etedi. Jalpy alǵanda, UBT-ǵa qatysty usynystardy qosa alǵanda, barlyq ózekti máseleler muǵalimderdiń tamyz jıynynda talqylanatyn bolady. Áriptesterimizdiń pikirin tyńdaımyz jáne belgili bir daýly máseleler boıynsha kelisimge kelemiz», — dedi A. Aımaǵambetov.
Eske sala keteıik, búgin QR Premer-Mınıstri Baqytjan Saǵyntaevtyń tóraǵalyǵymen ótken Úkimet otyrysynda QR bilim jáne ǵylym mınıstri Erlan Saǵadıev pedagogter qaýymy men ata-analar tarapynan túsken UBT men KT prosesin jetildirýge qatysty usynystardy jetkizdi. Osylaısha, UBT men KT-ny biriktirý, UBT ótkizý prosesinen mektep muǵalimderin bosatý, mektepterde synama testilerin ótkizbeý, memlekettik bilim granttaryn oqý tilderine bólmeı taǵaıyndaý jáne t.b. máseleler qaralyp jatyr.
