«Rýhanı jańǵyrý» baǵdarlamasy aıasynda atqarylǵan bul jobanyń alǵashqy kezeńi ótken jyly tabysty júzege asty. «Qazaqstannyń 100 jańa esimi» qanatqaqty jobasy birden qoǵamdyq talqylaýǵa túsip, halyq tarapynan qyzý qoldaý tapqan bolatyn. Uıymdastyrýshylarǵa osy jobany jalǵastyrýdy ótingen, jańa tabystar tarıhyn saraptaý týraly usynystar kóptep túskendikten Aqparat jáne kommýnıkasııalar mınıstrligi Qazaqstan halqy Assambleıasy hatshylyǵymen aqyldasa kele, jobanyń ekinshi kezeńine irikteý jarııalaýdy jón dep sheshti.
Bıylǵy irikteýdiń talaptary boıynsha úmitker eldiń jaǵymdy ımıdjin qalyptastyrýǵa yqpal etetin salalarda jarqyn jetistikteri bar, keıin ony qoǵamda ilgeriletý bedeline ıe 18 jasqa tolǵan Qazaqstan azamaty bolýy shart. Sondaı-aq qatysýshynyń qoǵamdyq-saıası jáne eńbek joly ózgelerge úlgi bolýy tıis. Jastardy adamgershilik, patrıottyq turǵyda tárbıeleıtin, týǵan jerin súıýge úndep, qoǵamda eńbek kýltin qalyptastyra alatyn adamdar men zamanaýı Qazaqstannyń damýyna naqty úles qosyp, elimizdiń jetistikteri men tabystaryn beıneleı alatyn azamattar qatysa alady. Jobaǵa qoǵamdaǵy barlyq salanyń ókilderi: dárigerler, kásipkerler, ǵalymdar, muǵalimder, sportshylar, óner qaıratkerleri jáne ózge de salada ónegeli eńbek etip júrgen adamdardyń qatysýyna múmkindigi bar. «Qazaqstannyń 100 jańa esimi» jobasynyń ekinshi kezeńine qatysýǵa salalyq assosıasııalar, qoǵamdyq uıymdar men birlestikter tarapynan da belsendilik kútilýde.
Elbasy bul joba týrasynda: «Jobada naqty adamdardyń naqty taǵdyrlary men ómirbaıandary arqyly búgingi, zamanaýı Qazaqstannyń kelbeti kórinis tabady. Táýelsizdik dáýirinde óziniń eńbegimen, bilimimen, ónerimen ozyp shyqqan qanshama zamandastarymyz bar. Olardyń júrip ótken joldary – kez kelgen statıstıkadan artyq kórsetkish. Jastar ómirge shynaıy kózben qarap, óz taǵdyrlaryna ózderi ıelik ete alatyn azamattar bolýy úshin olarǵa úlgi usynýymyz kerek», degen bolatyn. Sondaı-aq «Qazaqstannyń 100 jańa esimi» jobasyn iske asyrýdyń mańyzyna nazar aýdaryp, oǵan qatysýshylarǵa qoǵam tarapynan artylǵan jaýapkershiliktiń mol ekenin eskertken-di.
Jobanyń alǵashqy kezeńinde 340 myńnan astam qazaqstandyq ózderi tańdaǵan tulǵalarǵa 1 mıllıon 376 myń daýys berdi. Al jalpy tizimge qatysýǵa 2100 adam ótinish usynǵan. Búginde «100 esim» atanǵan azamattar túrli áleýmettik mańyzdy sharalarǵa qatysyp, jeke jobalaryn júzege asyrýda. Sondaı-aq jastardy jigerlendirýge arnalǵan suhbat alańdaryna spıker retinde qatysyp, jeke tabys qupııasymen jáne tájirıbesimen bólisip júr.
Venera TÚGELBAI,
«Egemen Qazaqstan»
