– Sońǵy jyldary Qarýly Kúshterdi damytý isinde kóptegen jumys atqaryldy. Birqatar mańyzdy strategııalyq qujattar qabyldandy, sonyń ishinde Ulttyq qaýipsizdik strategııasy, Qazaqstan Respýblıkasynyń Áskerı doktrınasy, Qarýly Kúshterdi damytý tujyrymdamasy jáne qorǵanys salasyna qatysty normatıvtik quqyqtyq aktiler bar, – dedi Qazaqstan Prezıdenti.
Memleket basshysy geosaıası ahýaldyń ózgerýi jáne jańa syn-qaterlerdiń paıda bolýy jaǵdaıynda Qorǵanys mınıstrliginiń aldynda turǵan negizgi mindetterdiń biri qarý-jaraqtardy tehnologııalyq turǵydan jetildirý jáne jańǵyrtý bolyp sanalatynyn aıtty.
– Sondyqtan, Qorǵanys mınıstri laýazymyna azamattyq tulǵany, ıaǵnı, qaýipsizdik jónindegi kómekshim – Qaýipsizdik Keńesiniń hatshysy Ermekbaev Nurlan Baıuzaqulyn taǵaıyndaýǵa sheshim qabyldadym. Sonymen birge, N.Ermekbaev kadrlyq ofıser, áskerı qyzmette tájirıbesi bar, sonyń ishinde shıelenis aımaqtarynda bolǵan. Ol halyqaralyq máseleler jónindegi kómekshi, Qytaıda jáne Ońtústik Shyǵys Azııanyń birqatar elinde elshi, mınıstr jáne eki ret Qaýipsizdik Keńesiniń hatshysy qyzmetterin atqardy, – dedi Nursultan Nazarbaev.
Memleket basshysy zamanaýı talaptardy eskere otyryp, áskerı kadrlardyń daıyndyǵyn jetildirý qajettigine nazar aýdardy.
– General-polkovnık Sáken Ádilhanuly Jasuzaqovqa qaltqysyz qyzmet etkeni úshin rızashylyq bildiremin jáne oǵan Ulttyq qorǵanys ýnıversıtetin basqarýdy tapsyramyn. Ýnıversıtet aldynda Qarýly Kúshterdiń basqarý quramynyń biliktiligin arttyrý jáne áskerı ǵylymdy damytý jónindegi mańyzdy mindetter tur. Ýnıversıtet elimizdiń ǵana emes, sondaı-aq kórshiles elderdiń de kýrsanttary oqıtyn negizgi ǵylym, bilim ortalyǵyna aınalýy tıis, – dedi Qazaqstan Prezıdenti.
Sońynda Qazaqstan Prezıdenti elimizdiń Qarýly Kúshterin odan ári damytý jóninde birqatar naqty tapsyrma berdi.
