Zaǵıp jáne nashar kóretin sportshylar bul joly 5 myń shaqyrymdy baǵyndyrmaq. Olar Qazaqstan, Reseı, Belorýs, Polsha, Germanııa jáne Fransııanyń 30 qalasyn basyp ótetin bolady. Marafonǵa qatysýshylar salamatty ómir salty men paralımpııadalyq sport túrlerin nasıhattaýdy maqsat tutypty.
«Biz óz mysalymyzben, isimizben múgedek jandarǵa velosıped tebýge, bul sportpen aınalysýǵa ábden bolady degen oıdy qalyptastyrý edi. Múgedekterdiń sportpen aınalysyp, chempıon bolǵanyna, bilim alyp, jumysqa turyp, tipti bıznespen aınalysyp, jumys ornyn ashyp otyrǵanyna barlyǵymyz da kýámiz» dedi jýrnalıstermen kezdeskende komanda kapıtany Bahtııar Bazarbekov. 2016 jyly 5 adam osy velosport komandasynyń negizin salǵan eken, qazir olardyń qatary 16 sportshyǵa jetipti.
Veloshabandoz jigitter osyǵan deıin Almaty – Astana, Almaty – Ystyqkól baǵyttaryn ıgerip úlgeripti.
«Shekarasyz sport» komandasynyń myna bastamasy maǵan óte unady. Olar qoǵamdyq sanany ózgertý úshin osyndaı áreketke baryp otyr.Qazir múmkindigi shekteýli jandar kóptegen is tyndyryp júrgeni belgili. Biraq jalpy qoǵamdyq sana ózgere qoıǵan joq. Múgedekter men qoǵam arasynda áli de kedergiler bar» deıdi Qostanaıdaǵy «Úmit-Nadejda» múgedekterge arnalǵan qoǵamdyq birlestik tóraǵasynyń orynbasary Arýna Jaqsyǵulova.
Búgin veloshabandozdar Qostanaıdan Ýfa qalasyna júrip ketti. Olardy quramynda dárigerler, vıdeoperatorlar, mehanıkter men aspazdar bar 4 mashına bastap júredi. Sportshylar ataqty "Týr de Frans" velosherýiniń otany bolǵan Parıjge deıin áli 4 myń shaqyrymdy artqa tastaıtyn bolady.
Názıra Járimbet,
«Egemen Qazaqstan»
Qostanaı
