Memlekettik hatshy eki el kóshbasshylarynyń tyǵyz ári ózara senimge negizdelgen dıalogynyń arqasynda Qazaqstan men Iran arasyndaǵy qarym-qatynastar jańa sapaly deńgeıge kóterilgenin, sondaı-aq memleketter basshylarynyń kezekti kezdesýi osy aptada 5-shi Kaspıı sammıti aıasynda ótetinin aıtty.
– Biz Iranmen saýda-ekonomıkalyq yntymaqtastyǵymyzdy keńeıtýge jáne nyǵaıtýǵa zor mán beremiz, – dedi G.Ábdiqalyqova.
Memlekettik hatshy Qazaqstan Prezıdenti Nursultan Nazarbaevtyń 2016 jyly Tegeran qalasyna sapary aıasynda qabyldanǵan Indýstrııalyq-ınnovasııalyq jáne saýda-ekonomıkalyq yntymaqtastyq baǵdarlamasynyń iske asyrylý nátıjelerine arnaıy toqtaldy. Ol aýyl sharýashylyǵy, tranzıt jáne logıstıka, jer qoınaýyn paıdalaný jáne ónerkásip sııaqty salalardy qamtıtyn, quny 1,38 mıllıard dollar bolatyn 48 jobadan turady.
– 2018 jylǵy qańtar-mamyr aralyǵyndaǵy saýda aınalymy 251,4 mıllıon dollarǵa jetti. Bul kórsetkish byltyrdyń osy kezeńimen salystyrǵanda (177,4 mıllıon) 41,7 paıyzǵa joǵary. Eksport 36,1 paıyzǵa ósip, 207,2 mıllıon dollarǵa artsa, ımport 76 paıyzǵa ulǵaıyp, 44,2 mıılıon dollar boldy, – dedi Gúlshara Ábdiqalyqova.
Memlekettik hatshy Eýrazııalyq ekonomıkalyq odaq pen Iran arasynda erkin saýda aımaǵyn jasaýǵa yqpal etetin ýaqytsha kelisimge qol qoıylǵanyn atap ótti. Ol preferensııalyq saýda rejimin ornatýǵa baǵyttalǵan jáne Dúnıejúzilik saýda uıymy men halyqaralyq quqyq normalaryna saı negizdelgen. Bul Qazaqstan men Iran arasyndaǵy ózara saýda-sattyqtyń turaqty sharttary men erejelerin qalyptastyrady.
– Biz tranzıttik-tasymaldaý, aýyl sharýashylyǵy, sonymen qatar jer qoınaýyn paıdalaný salasyndaǵy yntymaqtastyqty damytý úshin zor múmkindik bar ekenin kórip otyrmyz, – dedi G.Ábdiqalyqova.
Kezdesý sońynda Memlekettik hatshy Gúlshara Ábdiqalyqova elimizdegi dıplomatııalyq mıssııasyn aıaqtaǵaly otyrǵan Iran Islam Respýblıkasynyń Qazaqstan Respýblıkasyndaǵy Tótenshe jáne ókiletti elshisi M.Damırchılýge dostas memleketter arasyndaǵy ózara tıimdi yntymaqtastyqty nyǵaıtýǵa zor úles qosqany úshin rızashylyǵyn bildirip, jańa laýazymdaǵy qyzmetine sáttilik tiledi.
