«Elbasy N.Nazarbaev elimizdi Ortalyq Azııadaǵy úlken iri iskerlik tranzıttik habqa aınaldyrýǵa shaqyrǵan bolatyn. Sheteldik ınvestorlar keńesinde Elbasy «Jańa Jibek joly» aýqymdy jobasyn iske qosýdy usynǵan. Sonymen qatar «Bir beldeý, bir jol» forýmy elimizdiń geosaıası jobalaryn júzege asyrýǵa úlken múmkindik beredi. Elbasy «Qazaqstan óziniń tarıhı rólin qaıta jańǵyrtyp, Orta Azııalyq aımaqtaǵy eń iri iskerlik habqa, Eýropa men Azııa arasyndaǵy kópirge aınalýy tıis, degen bolatyn. Álem Qazaqstandy tek qana munaıly el retinde emes, sondaı aq mádenı jańalyqtary arqyly da taný kerek. Bul týraly Memleket basshysynyń «Bolashaqqa baǵdar: rýhanı jańǵyrý» atty maqalasynda da aıtylǵan. Sondyqtan da biz Qazaqstannyń zamanaýı mádenıetin álemde kórsetetin jobalardy júzege asyrýymyz kerek. Elimizdiń mádenıet, sondaı-aq týrızm salasyndaǵy jańalyqtarymen tanystyrý úshin qazan aıynda Shanhaıda ótetin «The Most Credible Award 2018» halyqaralyq kınofestıvalde Qazaqstannyń kınotýyndylaryn kórsetemiz», deıdi «KOZ Production» Bas dırektory, akter Muhammed-Rasýl Kózdibaı.
Jibek joly boıyndaǵy elderden kelgen qonaqtardyń qatysýymen ótetin bul sharada otandyq óndiristegi fılmder de usynylatyn bolady.
«Bul kınofestıval bizdiń kınematografymyz Azııa jáne Eýropanyń birqatar elderimen básekelesýge qabiletti ekendigin kórsetip, elimizdiń mádenıetin damytýǵa aıtarlyqtaı serpin beredi. Atalǵan is-shara Qytaıdyń óner juldyzdary Donnı Ien (Ip Man, Juldyzdar soǵysy), qytaılyq tanymal rejısser Chjan Chjı Zong, akter Sammo Hýn jáne basqa da tanymal ártister, ánshilerdiń qatysýymen ótedi. Al keshtiń negizgi qonaqtarynyń biri – bizdiń talanty ánshimiz Dımash Qudaıbergen jáne taǵy basqa qazaqstandyq birqatar ánshi, aketerleri de qatysatyn bolady», dep atap ótti kastıng dırektor Ádilet Qapash.
Sonymen qatar Muhammed-Rasýl Kózdibaı «The Most Credible Award 2018» halyqaralyq kınofestıvaline 20-ǵa jýyq fılm qatysatynyn aıtty. Onyń ishindegi eń úzdik degen alty jeńimpaz fılm Jibek jolynyń elderine jáne Qytaı kınoprokat naryǵyna shyǵady. Kınofestıvalde 10-ǵa jýyq otandyq týyndy baq synamaq.
Kınofestıval álemniń 124 eline translıasııa jasalady. Is-sharaǵa qatysýshylar 9-dan asa elden iri BAQ ókilderimen tanysýǵa múmkindik alyp, aryqaraı yntymaqtastyq arqyly jańa jobalar paıda bolýy múmkin.
Raýan QAIDAR
«Egemen Qazaqstan»
