Is-sharaǵa QHA Tóraǵasynyń orynbasary – Hatshylyq meńgerýshisi Leonıd Prokopenko men Adam quqyqtary jónindegi ýákil Asqar Shákirov jáne QHA músheleri men Adam quqyqtary jónindegi ulttyq ortalyqtyń ókilderi qatysty.
Qujatqa qol qoıý rásimi kezinde L.Prokopenko buǵan deıin qos qurylymnyń arasynda qalyptasqan yntymaqty qarym-qatynastardy jetildirýdiń sáti túsip otyrǵandyǵyn jetkizdi.
Memorandýmda taraptardyń qoǵamdyq kelisim men jalpyhalyqtyq birlikti nyǵaıtýǵa, adam quqyqtaryn qorǵaýǵa baǵyttalǵan mindetterdi iske asyrýdaǵy yntymaqtastyǵy, jastardy patrıottyq, ultaralyq jáne mádenıetaralyq dıalog baǵytyndaǵy is-sharalardy ótkizýge, azamattyq qaýymdastyq sezimdi qalyptastyrý baǵytyndaǵy is-sharalardy uıymdastyrýǵa tartý jáne qoǵamdyq kelisim salasyndaǵy basqa da máseleler kózdelgen.
Al A.Shákirov óz sózinde Memleket basshysynyń ultaralyq tatýlyqqa, azamattardyń quqyqtarynyń qorǵalýyna erekshe mán beretindigin atap ótti.
– Azamattardyń quqyqtary el Konstıtýsııasy men ózge de sabaqtas qujattarda aıqyn belgilengen. Elimizdiń zańdary azamattardy dinı, etnostyq belgilerine baılanysty qýdalaýǵa, qysym kórsetýge tyıym salady. Ony buzǵandarǵa tipti qylmystyq jaýapkershilik te qarastyrylǵan. 1998 jyly elimiz násildik kemsitýshiliktiń barlyq nysandaryn joıý týraly halyqaralyq konvensııaǵa qosyldy. 2008 jyly BUU násildik kemsitýshilikti joıý jónindegi komıtetiniń ókilettiligin moıyndady. Eń bastysy, Elbasy jetekshilik etetin Qazaqstan halqy Assambleıasy azamattardyń quqyqtary men bostandyqtarynyń qorǵalýyna súbeli úles qosyp keledi, – dedi Adam quqyqtary jónindegi ýákil.
Resmı qujattarǵa qol qoıylǵannan keıin taraptar ózara is-qımyl sharalarynyń josparyn talqylady.
Serik ÁBDIBEK,
«Egemen Qazaqstan»
