Jazyq dalada qaz-qatar tizilgen aqshańqan kıiz úılerdi kórip, Arqa tósin ánge bólegen ádemi áýen estilgende, bul basqosýdyń jóni de, joly da erek ekeni bilingendeı edi. 500 jyl buryn dál osy Qaraegin aýyly mańyndaǵy Shubyrtpaly kóliniń janynda Temirqoja baba dúnıe esigin ashqany, kindiginen órbigen on atanyń barlyǵynan ádil bıler, ot tildi kósemder men sheshender ǵana emes, bahadúr batyrlar da kóptep shyqqany tarıhtan belgili. Almaǵaıyp zamanda azattyq kúresiniń asqar shyńyndaı Kenesary han bastaǵan shaıqastarǵa Shubyrtpaly eliniń batyrlary qatysyp, el bostandyǵy jolyndaǵy kúrestiń bel ortasynan tabyldy.
Ataýly dataǵa arnalǵan alqaly jıynnyń ajaryn ashqan ashyq aspan astyndaǵy sahnada teatrlandyrylǵan kórinister kóne tarıhtan syr shertti. Ádepti aıtys, ádemi ánmen terbelgen dala tósi jetigen, dombyra, syrnaı sııaqty ult aspaptarymen túrlene, terbele tústi. Jınalǵan jurt Syr elinen kelip, jyrdan shashý shashqan Á.Noǵaıbaev, M.Bekpeıisov, A.Noǵaıbaeva syndy ónerpazdarǵa dán rıza bolsa, óńirdiń jas aqyndary da júıeli sózimen el yqylasyna bólendi.
Asqa kelgen aıtýly azamattar, mesenattar Qaraegin, Sabyndy aýyldarynyń áleýmettik turǵydan az qamtylǵan jáne tolyq emes otbasylardyń mektep jasyndaǵy balalaryna qajetti kıim-keshek, oqý qural-jabdyqtaryn tartý etti. «Rýhanı jańǵyrý» baǵdarlamasy aıasynda Arqa jurtynyń arqasyn keńge salyp, eldiń ótken tarıhyna taǵzym etken Qaraegindegi asqa úsh myńǵa jýyq meıman jınaldy. О́ner báıgesinen bólek, jasóspirimder arasyndaǵy qazaq kúresi men túıe balýandardyń da básekesi tartysty ótip, Aıbat Seıten, Álibek Zekenov, Oljas Shynkeev syndy bilekti de júrekti jigitter oljaly qaıtty. Kún ekindiden aýǵanda bastalǵan alaman báıgede birinshi oryndy astanalyq tulpar enshilep, avtokólik utyp alsa, ekinshi jáne úshinshi oryndy Tarazdan kelgen sáıgúlikter enshiledi. Arqa tósindegi asty uıymdastyrǵan «Aǵybaı batyr» qorynyń tóraǵasy Ǵabıt Musabekov, Marat Dáribekov, Shahmardan Syzdyq, Berik Myrzahmetov, Almaı Bımen syndy azamattardyń eren eńbegine dúıim halyq rızashylyq bildirdi.
Aıda QYDYRBAIQYZY,
«Egemen Qazaqstan»
