Osydan shırek ǵasyr buryn qurylǵan «Ásem» sharýa qojalyǵy eginshilikpen aınalysady. Sońǵy jyldary mal sharýashylyǵyna da túbegeıli bet buryp otyr. Qazir munda 320 bas Qambar ata, 300 basqa jýyq Zeńgi baba, 980 bas Shopan ata túlikteri ósiriledi.
Zamanaýı tehnologııalardy sharýashylyqta qoldanýdy dittegen qojalyq ıesi Asan Atymtaev jýyrda tabıǵı baldyrdan qunarly azyq ázirleıtin ınnovasııalyq seh ashyp, alǵashqy ıgiligin kóre bastady.
– Búginde mal dárileriniń baǵasy qymbat. О́nimniń ózindik qunyn kemitetin ońtaıly joldardy izdestire kelip mal sharýashylyǵynda hlorella bıotehnologııasynyń jańashyl úlgilerin engizýdi, sóıtip qoǵamdyq maldardy dárýmeni mol, aqýyzǵa baı jemshóp qospasymen qamtamasyz etýdi jón kórdik. «Bıznestiń jol kartasy-2020» baǵdarlamasyna qatysyp, 2,5 mıllıon teńgeniń grantyn jeńip aldyq. Bul qarajatty maldyń ımmýnıtetin jaqsartyp, túrli aýrýlardyń aldyn alýǵa múmkindik beretin, ónim kólemimen qatar sapasyn da arttyratyn qospalar alýǵa jumsalady. Ásirese jas tólder úshin suıyq eritindi birden-bir em, jaqsy qabyldap, oınaq salyp júr, – dedi ózi malsaq jan.
Sharýashylyqqa qajetti qural-jabdyqtar Reseıden ákelingen, sondaı-aq arnaıy mamandar qysqa merzimdi kýrs bitirip kelgen. Asannyń endigi oıy – iri qara malynyń, onyń ishinde sútti sıyrlardyń sanyn kóbeıtý. Bul úshin saýyn fermasy talapqa saı jabdyqtalyp, júz bas asyl tuqymdy mal ákelinbek. Qazir 120 sıyr saýylady. 40-qa jýyq aýyldasy eńbek etetin qojalyq «Sıyrdyń súti – tilinde» degen sózdi jaqsy túsingen. Qunarly jemshóptiń arqasynda súttiń molaıǵany, kerisinshe jumsalatyn shyǵynnyń kemigeni baıqalady.
О́mir ESQALI,
«Egemen Qazaqstan»
Soltústik Qazaqstan oblysy,
Shal aqyn aýdany
