Jıyn barysynda qajylyq maýsym kezinde atqarylatyn sharalar pysyqtalyp, ásirese adamdardy tasymaldaıtyn áýe kompanııalarynyń daıarlyǵy, sondaı-aq mindetti vaksına qabyldaý rásimi men vıza máselesi keńinen talqylandy.
QMDB tóraǵasy, bas múftı Serikbaı qajy Orazdyń aıtýyna qaraǵanda, bıyl Saýd Arabııasy Koroldiginiń Qajylyq isteri jónindegi mınıstrligimen kelisim boıynsha úsh myń qazaqstandyqqa qulshylyq kvotasy bólinipti. Bulardy qasıetti saparǵa alyp barý úshin 18 otandyq týrıstik kompanııa qyzmet kórsetýge daıyn. Atalmysh mınıstrlik ótken jyly dinı týrızm salasynda týroperatorlyq qyzmetti júzege asyrý qaǵıdalaryn bekitken. Barlyq shara osy qaǵıdat negizinde oryndalady.
Mınıstr Darhan Káletaevtyń aıtýynsha, qajylyqty qadaǵalaý hám uıymdastyrý maqsatynda vedomostva dinı basqarmamen birlesip 14 adamdyq top qurypty. Bul quramda: dinı basqarmadan 7, buqaralyq aqparat quraldarynan 3, Densaýlyq saqtaý jáne Qoǵamdyq damý mınıstrliginiń ár qaısysynan eki-ekiden ókil bar.
Qajylardy tasymaldaý isin Qazaqstan men Saýd Arabııasynyń áýe kompanııalary 50/50 paıyz úles negizinde atqarmaq. Bul isti tııanaqty atqaryp shyǵýdy saýdııalyq «Fly Nas» áýe kompanııasy ózine mindettese, bizdiń taraptan «SCAT» áýe kompanııasy qyzmet kórsetedi.
Sonymen qatar qajylardyń mindetti túrde vaksına qabyldaý sharasy elimizdiń bes qalasynda ornalasqan 8 medısınalyq ortalyqta atqarylady. Vaksına baǵasy – 28 myń teńge. Qajylyq paryzyn óteýshiler Saýd Arabııasyna 9-15 tamyz aralyǵynda baryp, 1 qyrkúıekke deıin elge oralady.
Beken QAIRATULY,
«Egemen Qazaqstan»
