Jalǵas Qumarov - kóp jyl keden salasynda qyzmet atqarǵan, Qarǵaly aýdanynyń Badamsha eldi mekeniniń turǵyny. Ol komıssııaǵa usynǵan bıznes-jobasynda kórsetkendeı «Aqtóbe-Orsk» tas jolynyń boıynda ornalasqan «Álimbet» ótkizý pýnkti mańyna gaz quıý stansııasyn salýdy josparlaıdy. Esebinshe, bul jolmen kólik kóp ótetin bolǵandyqtan, bıznes tabysty bolýy tıis.
«Avtokólikterdiń sanynyń kóbeıýine baılanysty bul salaǵa baılanysty bıznes túriniń barlyǵy paıda ákeledi dep esepteımin. Ásirese, qazir benzın baǵasynyń qymbattaýyna baılanysty gaz saýdasy qyzyp tur. Jergilikti bılik te janar-jaǵar maıdy únemdeý maqsatynda kólikterdiń gazben júrýge kóshýin quptap otyr. Sondyqtan bul jobamdy iske asyrýda qıyndyq bolmaıdy dep oılaımyn»,-deıdi «Bastaý» jobasynyń tyńdaýshysy Jalǵas Qumarov.
Komıssııa músheleri oǵan gaz stansııasynyń qurylysyna qajetti jer ýchaskesin alý máselesi jóninde suraq qoıdy. Bolashaq kásipker jer alýǵa ótinishti Qarǵaly aýdandyq jer bólimine jáne Qazavtodor RMK ótinish bergenin, búgingi kúni qaralyp jatqanyn aıtty.
«Bastaý» jobasynyń taǵy bir qatysýshysy, Baıǵanın aýdanynyń turǵyny Jasarbek Qurmashev Qaraýylkeldi aýylynda tokar sehyn ashpaq. Aıtýynsha, aýyl turǵyndary kásibı tokar qyzmetine zárý. Joba maquldanǵan jaǵdaıda Aýylsharýashylyqty qoldaý qorynan nesıege 1 000 000 teńge kóleminde qarjy almaq. Bul soma sehqa qajetti barlyq quraldardy alýǵa jetpeıdi. Munan kóp qarajat alýǵa Jasarbektiń kepilzatqa qoıatyn qundy múlki az bolyp tur. Kásipker bastapqy ýaqytta kórsetilgen somaǵa buryn qoldanysta bolǵan stanoktardy satyp alyp, kásip bastamaqshy. Bolashaqta bıznesi júrip jatsa, budan úlken somaǵa tapsyrys bermek.
Aýyl kásipkerleri úı qustaryn ósirý isine de qyzyǵýshylyq tanytyp otyr. Naryqta úırek, qaz, kúrketaýyq etine suranys joǵary kórinedi. Densaýlyqqa paıdaly bolǵandyqtan mundaı qus etteri elimizde kóptep qoldanyla bastady. Durys kútim kórsetip, ósire alǵan jaǵdaıda qus etin alys-jaqyn shetelge satýǵa bolady. Mundaı jobalardy Qarǵaly jáne Hromtaý aýdanynyń sharýalary júzege asyrmaq.
Ár aýdannan kelgen joba qatysýshylary mal sharýashylyǵyn damytyp, azyq-túlik dúkenderin, ásemdik salonyn, tigin sehyn, shashtaraz ashýǵa baılanysty bıznes-josparlaryn usyndy. Olardyń arasynda jol boıyndaǵy qyzmet kórsetý salasyn órkendetip, ashana, sýshı, taksı qyzmetimen aınalysqysy keletinder bar eken. Komıssııa músheleri olardyń osy qyzmettermen aınalysýǵa arnaıy qujattarynyń bar-joǵyn tekserip, qarjylyq saýattylyǵyn anyqtaýǵa arnalǵan saýaldar qoıdy. Bıznes-josparyn qorǵaýǵa kelgen aýyl turǵyndary «Bastaý» jobasyna qatysyp, kásip ashýdyń qyr-syryn úırengenderin aıtady. «Bastaýlyqtar» joba bolmaǵanda kásipkerlikti damytýǵa arnalǵan memlekettik qoldaý sharalary týraly bilmegen de bolar edik desti.
Aıtyp ótsek, bıznes-josparlaryn sátti qorǵaǵan «Bastaý» jobasynyń túlekterine «Aýylsharýashylyqty qoldaý qory» arqyly 54 aıdan kóp emes merzimge 6 % nesıeleý múmkindigi qarastyrylǵan. Sonymen qatar, olardyń nesıe seriktestikteri jáne ekinshi deńgeıli bankter arqyly jeńildetilgen nesıege qol jetkizýge múmkindikteri bar.
«Bastaý» jobasy «Atameken» Ulttyq kásipkerler palatasynyń bastamasymen nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan memlekettik baǵdarlamasynyń ekinshi baǵyty aıasynda júzege asyrylýda. 2018 jyly barlyǵy 2 231 adam oqytylyp, olardyń eń kemi 446–sy jeńildetilgen nesıege ıe bolady dep kútilýde.
Temir Qusaıyn,
«Egemen Qazaqstan»
AQTО́BE
