1993 jyly 1 qyrkúıekte, alǵashqy qońyraýda mektepke balalar ádebıetiniń klassıgi, áıgili jazýshy Berdibek Soqpaqbaevtyń esimi berilgeni týraly sheshim oqyldy. Oǵan mekteptiń ashylý saltanatyna qatysqan sol kezdegi aýyl keńesiniń tóraǵasy Mádenıet Tastanbekuly Kárkenov (qazir aýdandyq aqsaqaldar keńesiniń tóraǵasy), mektep dırektory Ultaı Amangeldiqyzy Barhınova (qazir Qarasaı aýdanynda ákimshilik qyzmette) jáne basqa da quzyrly oryndardan kelgen adamdar, sonymen birge, búkil ata-analar men ustazdar, barlyq aýyl turǵyndary kýá.
Osy mektepte Berdibek Soqpaqbaevtyń týǵanyna 80 jyl tolýyn úlken saltanatpen ótkizgenbiz. Oǵan Berdibektiń kózin kórgen belgili aqyn-jazýshylar Qadyr Myrza-Áli, Áshirbek Syǵaı, Kádirbek Segizbaev, Baqqoja Muqaı, Shekerbek Sadyhanov, Temirhan Tebegenov, Asqanbaı Erǵojaev sekildi qalamgerler jáne Berdibek Soqpaqbaevtyń jary, qyzy, basqa da týǵan- týysqandary, Raıymbek aýdanynan arnaıy delegasııa kelip qatysqan edi.
Jyldar jyljyp ótkende Almaty qalasynda jańa aýdan shańyraq kótergenine oraı barlyq mektepti qaıta tirkeý júrgiziledi. Sol kezde mektepke klassık jazýshynyń esimi berilgeni jónindegi qujat «joq» bolyp shyǵady. Mektep aldymen Qaskeleń aýdanyna, sodan soń Qarasaı aýdanyna, odan keıin Áýezov aýdanyna, keıin Naýryzbaı aýdanyna aýysty. Osy aýysýlar kezinde qujat bir qaltarysta qalǵan ǵoı. Aqıqatyna kelgende jaýapkershilikpen izdegen jan bolmaǵan. Kóp uzamaı «mektepke Berdibek Soqpaqbaevtyń aty berilgeni jónindegi sheshim joq eken» degen jeleýmen qasıetti esim aıaqastynan alynyp tastalǵan da, «№188 orta mektep» deline salǵan. «B.Soqpaqbaevtyń aty berilgeni jónindegi sheshim joq eken» degen sóz jalǵan – 1993 jyly Almaty oblysy ákimdiginiń 15 qyrkúıekte shyǵarǵan №135 sheshimi áli óz kúshin joıǵan joq.
Qazir bul mektep jańa qurylǵan Naýryzbaı aýdanynyń enshisinde. Mektepte alǵash eki júzdeı ǵana oqýshy tabaldyryq attasa, qazir myńnan astam bala oqıdy.
1993 jyldan bastap Naýryzbaı aýdany qurylǵanǵa deıin Berdibek Soqpaqbaev atyndaǵy orta mektepti bitirgeni jóninde qanshama túlek attestat aldy. Osy jyldar ishinde «Berdibek Soqpaqbaev atyndaǵy qazaq orta mektebi» dep mór basylǵan qanshama qujat toltyryldy. Sonyń bári zańsyz, Berdibek Soqpaqbaevtyń esiminiń berilýi de durys emes bolyp shyǵa ma, sonda?
Qazaqtyń atyn álemge tanytqan klassık jazýshynyń esimin urpaq jadynan óshirip almaı, qaıta onyń ómiri men shyǵarmalaryn nasıhattaý arqyly jas býyn sanasyna otanshyldyq rýhty sińirýge muryndyq bolyp kele jatqan mektepke Berdibek Soqpaqbaev esimin qaıtarýymyz kerek. Bul meniń ǵana sózim emes, bul mektep ustazdarynyń da, ata-analarynyń da, túlekteriniń de, qazirgi shákirtteriniń de tilegi.
R.S. Tipti qınalatyn eshteńe joq. Burynǵy aty «Berdibek Soqpaqbaev atyndaǵy qazaq orta mektebi» edi. Qazirgisi «№188 qazaq orta mektebi» bolyp tur. Osy ekeýin biriktirip «Berdibek Soqpaqbaev atyndaǵy №188 qazaq orta mektebi» dep atasaq boldy emes pe!
Saǵatbek MEDEÝBEKULY,
Bilim berý isiniń qurmetti qyzmetkeri
Almaty
