О́tken jyly álemniń alty elinde taratylǵan, 200 mıllıonnan asa adam tamashalaǵan úlken joba jalǵasyn tabady.
Sonymen, Almaty qalasynda «31 arnanyń» uıymdastyrýymen halyqaralyq «I`m a Singer Kazakhstan» talant-shoýynyń ekinshi maýsymynyń tusaýy kesildi. Bıylǵy maýsymnyń syılyq qory 50 000 000 teńgege jetti. Qazaqstanda balamasy joq ǵalamat jobaǵa álemniń ár túkpirinen eń myqty daýys ıeleri jınalady.
Halyqaralyq talant-shoýynyń jańa bastalýyna oraı joba jetekshileri basty jańalyqtarymen bólisip, resmı túrde joba kastınginiń aıaqtalǵanyn habarlady.
Osy ónerdiń ózi de ómirimizdiń búkil salalarymen sabaqtas bolǵandyqtan, «31 arnanyń» bas dırektory Baǵdat Qojahmetov atalmysh joba Qazaqstannyń kórikti mekenderin qamtýǵa, týrızmdi de nasıhattaýǵa kúsh salatyndyǵyn aıtty. О́ıtkeni bıylǵy baıqaýǵa shet memleketterden de qatysýǵa tilek bildirip otyrǵan talanttar kóbeıdi. Máselen, bıylǵy jandy daýystar jarysyna qatysýǵa 4 myńnan asa adam ótinish jiberdi. Olardyń arasynda Qazaqstannan bólek, Reseı, Ýkraına, О́zbekstan, Qyrǵyzstan, Ázerbaıjan, Iran, Armenııa jáne Belarýs memleketterinen nıet bildirgender de bar.
Ánsúıer qaýymnyń esinde bolsa, tanymal ánshilerimiz bul joba byltyr bastalǵanda baq synaýǵa asa yqylasty bolmap edi. 2017 jyly kúz-qys telemaýsymynyń eń aýqymdy mýzykalyq oqıǵasy atanǵan «I’m a Singer Kazakhstan» jobasynyń birinshi maýsymyna 6 elden 8 kásibı án oryndaýshy qatysyp, qazaqstandyq ánshi Qaırat Túntekov jeńiske jetken-di.
Esesine bıylǵy jobaǵa elimizdiń 30 shaqty tanymal estrada juldyzy qatysqaly otyr. Jáne qatysatyn memleketterdiń de sany artty.
Sondaı-aq bıyl ǵalamat sharanyń erejelerine ózgerister endi. Budan bylaı shoýǵa 16 jasqa tolǵan, ózine senimdi kez kelgen úmitker ótinish bildire alady.
«Bul joba – kez kelgen mýzykalyq estradanyń dárgeıin kóteretin shoý, – deıdi «31 arnanyń» bas dırektory Baǵdat Qojahmetov. – Ol jaı ǵana án saıysy emes, ony juldyzdardyń óneri dep qaraý qate. Ol, eń aldymen, ózindik dramatýrgııasy bar, ánshiniń ishki jan tebirenisin beıneleıtin biregeı oqıǵa. Mundaı jobalardyń basym bóligi kóptiń arasynan bireýdi sýyryp alyp shyǵyp, juldyz jasaýdy maqsat tutsa, bul shoýdyń maqsaty – kerisinshe juldyzdyń da adam ekenin kórsetý. Bir uqsastyǵy, ekeýiniń de quraly – án».
Bıylǵy maýsymda sarapshylar da jurttyń súıikti ánshilerinen quralǵan. Olardyń arasynda Sáken Maıǵazıev, Maqpal Júnisova syndy ánshiler bar.
– Mundaı aýqymdy halyqaralyq jobaǵa qazylyq etý – úlken mártebe. Bas júldeger Almatyda jeke konsertin ótkizip, jańa ánin jazyp, beınebaıan túsirýge jáne ony qazaqstandyq radıostansııalarda, mýzyka telearnalarynda jyl boıy rotasııalaýǵa múmkindik alady, – deıdi shoý jańalyqtarymen bólisken baıqaý tóreshisi Sáken Maıǵazıev.
Aınash ESALI,
«Egemen Qazaqstan»
