Qazirgi kezde respýblıka óńirlerine oqýlyqtar jetkizý qarqyndy júrip jatyr. «Polıgrafkombınat» óndiristik keshenindegi baspahana jumystarymen tanystyrý barysynda «Atamura» korporasııasynyń prezıdenti Raqymǵalı Qul-Muhammed «Polıgrafkombınat» óndiristik kesheniniń oqýlyqtar shyǵarýdaǵy jetistikterine toqtaldy. Al «Polıgrafkombınat» JShS dırektory Ydyrys Begalıev jetpis jyldan asa tarıhy bar óndiris ornyndaǵy jumys barysymen tanystyrdy. Oqýlyqtardyń baspadan keıingi baspahana óndirisi týraly keńinen baıandap, kitap bolyp túptelip, aımaqtarǵa jóneltýge deıingi barlyq kezeńderdi qamtyp ótti.
О́ndiristik keshen jumysynan keıin №159 mektepte baspagerler, oqýlyq avtorlarynyń qatysýymen arnaıy baspasóz máslıhaty ótti. Atalǵan sharany júrgizgen QR Bilim jáne ǵylym mınıstriniń keńesshisi Maırash Taıkenova oqýlyqtardyń daıyndyq barysyna toqtalyp, sóz kezegin kásibı mamandarǵa usyndy. О́z kezeginde «Oqýlyq» respýblıkalyq ǵylymı-praktıkalyq ortalyǵynyń dırektory Beıbitgúl Kárimova 2018-2019 oqý jylynda 3,6-8-synyptarǵa arnalǵan oqýlyqtardyń bilim úderisine engizilý barysynan habardar etti. Beıbitgúl Sársemhanqyzynyń aıtýynsha, atalǵan oqýlyqtar pılottyq mektepterde synaqtan ótip, qoǵamdyq baǵalaý, ǵylymı-pedagogıkalyq saraptama kezńderinen ótken. Qazirgi kezde oqý ádebıetteriniń Tizbesine engizilgen.
Oqýlyqtardyń daıyndalý barysyna qatysty «Atamura» korporasııasynyń prezıdenti Raqymǵalı Qul-Muhammed, «Mektep» baspasynyń Bas dırektory Erlan Satybaldıev, «Almatykitap baspasy» JShS prezıdenti Gaýhar Saımasaeva jáne oqýlyq avtorlary kóptegen mańyzdy máselelerdi ortaǵa salyp, jýrnalısterdiń suraqtaryna jaýap berdi.
Elvıra Serikqyzy,
«Egemen Qazaqstan»
ALMATY
