Bilim basqarmasynyń basshysy Ánýar Janǵozınniń aıtýynsha, qazirgi kezde bir jataqxananyń qurylysy aıaqtalýǵa jaqyn. Ol 188 kóshesiniń boıynda (Seıfýllın kóshesiniń basynda) ornalasqan. Sol jerge ákimdik biliktiligi joǵary ári tájirıbesi bar muǵalimderdi ornalastyrýdy kózdeıdi. Sebebi dál sondaı mamandar elordanyń bilim berý salasyn damytýǵa óz úlesterin qosa alady.
"Budan bólek, biz aımaqtardan keletin mamandarǵa xostelderdi usynamyz. Ol jerde bir jatyn orynnyń baǵasy 35 000 - 45 000 myń teńgeniń aınalasynda. Negizi, ondaı jerlerde de jaqsy jaǵdaı jasalǵan", - dedi Á.Janǵozın.
Onyń aıtýynsha, aldaǵy ýaqytta bıýdjet salasynyń mamandary úshin shaǵyn páterlerdi salý josparlanyp otyr. "Astanaǵa jyl saıyn aımaqtardan 400-500 muǵalim keledi. Olardyń barlyǵy jalǵyz emes, otbasylary bar. Árıne, bárin jataqxanamen qamtamasyz etý múmkin emes. Sol sebepti ázirshe tek úzdikterge ǵana jataqxana beremiz. Máselen, ýnıversıtet túlegi bolsa, onyń jetistikteri men taǵylymdamasy eskeriledi. Álbette, eńbek ótili bar mamandarǵa da basa nazar aýdarylady", - dep atap kórsetti Á.Janǵozın.
Aıta keteıik, búginde elordada mektepke deıingi oqytý, matematıka, orys tili men ádebıet, aǵylshyn tili boıynsha maman tapshylyǵy bar. Osyǵan oraı, 11 tamyzdan bastap qalada apta saıyn bos oryndary jármeńkesin ótkizý josparlanyp otyr.
"Astanada jumys isteıtin pedagogtar mańyzdy oqıǵalardy bel ortasynda júredi. Bilim berý salasyndaǵy barlyq jańalyqtardy da birinshi bolyp biledi, xalyqaralyq jobalarǵa da qatysady. Olar únemi óz bilimderin shyńdaı alady. Sondyqtan bilikti mamandardy elordaǵa shaqyramyz", - deıdi jármeńke uıymdastyrýshylary.
