Jıyndy ashqan Memleket basshysy Kaspıı mańy aımaǵynyń tarıhı, mádenı, rýhanı-ıdeologııalyq, geosaıası mańyzyn erekshe atap ótti.
Nursultan Nazarbaev elimizdiń munaı óndirý ındýstrııasyn, ınfraqurylym jáne kólik-logıstıka áleýetin damytý isinde Mańǵystaý oblysynyń ulttyq ekonomıkaǵa eleýli úles qosyp otyrǵanyn aıtty.
– Bul oblys «Nurly jol» baǵdarlamasynyń arqasynda iri kólik-logıstıka ortalyǵyna aınalyp otyr. Munda áýe, avtomobıl joldary, temir jol, parom jáne teńiz kólikteri jelisi toǵysqan. Atap aıtqanda, halyqaralyq áýejaı, «Jezqazǵan–Beıneý» jáne «О́zen–Túrikmenstannyń memlekettik shekarasy» temir joldary, «Atyraý–Aqtaý» avtomobıl joly salynyp, zamanaýı Aqtaý teńiz porty jáne Quryq parom kesheni iske qosyldy. Bul jobalar óńir ekonomıkasynyń damýyna tyń serpin beretin bolady, – dedi Qazaqstan Prezıdenti.
Memleket basshysy Besinshi Kaspıı sammıtine daıyndyq júrgizý jáne ony ótkizý máselelerine aıryqsha toqtaldy.
– Erteń munda Kaspıı mańyndaǵy bes memlekettiń basshylary jınalyp, tarıhı qujatqa – Kaspııdiń quqyqtyq mártebesi týraly konvensııaǵa qol qoıady. Atalǵan qujat 20 jyldan astam ýaqyt boıy daıyndaldy, – dedi Elbasy.
Mańǵystaý oblysynyń ákimi Eraly Toǵjanov óńirdiń áleýmettik-ekonomıkalyq damý barysy jónindegi esebinde bıylǵy 6 aıdyń qorytyndysy boıynsha oblys ekonomıkasynyń ósý qarqyny turaqty ekenin aıtty.
– Jalpy óńirlik ónim kólemi 2017 jyldyń osy kezeńimen salystyrǵanda 99,2 paıyzdan 104,4 paıyzǵa ósti. О́nerkásiptiń negizgi ındeksi 101,2 paıyzdy qurap otyr. Negizgi kapıtalǵa salynǵan ınvestısııa úlesi 6 paıyzǵa artyp, 256 mıllıard teńgege jetti, – dedi oblys ákimi.
Eraly Toǵjanov Indýstrııalandyrý kartasy júzege asyryla bastaǵaly oblysta 42 joba iske qosylyp, 392 mıllıard teńge kóleminde tikeleı ınvestısııa tartylǵanyn, sondaı-aq búginde jalpy quny 418 mıllıard teńge bolatyn 89 joba oryndalyp jatqanyn málimdedi.
– «Nurly jol» jáne «Nurly jer» memlekettik baǵdarlamalarynyń júzege asyrylýy óńir ekonomıkasynyń damýyna serpin berdi. Sonyń aıasynda respýblıkalyq jáne jergilikti mańyzy bar 600 shaqyrym jol salyndy jáne qaıta jóndeldi. Sondaı-aq, 1,8 mıllıon sharshy metr turǵyn úı salyndy, – dedi óńir basshysy.
Oblys ákiminiń esebinen soń, Elbasy óńirdegi áleýmettik-ekonomıkalyq kórsetkishterdiń turaqty ekenin atap ótip, odan ári pysyqtaýdy qajet etetin birqatar máselege toqtaldy.
– Ekonomıkanyń turaqty damýyna qol jetkizý kerek. Ol úshin ekonomıkany dıversıfıkasııalap, qyzmet kórsetý men óńdeý sektoryn damytýdy qamtamasyz etý qajet. Mysaly, munda jalpy kólemi 2 myń gektar bolatyn «Morport Aqtaý» arnaıy ekonomıkalyq aımaǵy jumys isteıdi. Memleket onyń ınfraqurylymyn damytýǵa qajetti qarajat bóldi. Endi onyń jumysyn jandandyryp, jańa jumys oryndaryn ashý kerek, – Qazaqstan Prezıdenti.
Nursultan Nazarbaev Mańǵystaý oblysynyń týrıstik áleýetiniń zor ekenin aıtyp, oblystyń geografııalyq jáne mádenı artyqshylyqtaryn, sonyń ishinde óńirdiń teńiz jaǵasynda ornalasqanyn, sondaı-aq munda jalpyulttyq jáne halyqaralyq máni zor kóptegen tarıhı eskertkishterdiń bar ekenin atap ótti.
Jıyn sońynda Memleket basshysy ákimdikke Úkimetpen birlesip, óńirdiń kólik-logıstıkalyq áleýetin odan ári paıdalaný, shaǵyn jáne orta bıznesti damytý, jańa jumys oryndary ashý, sondaı-aq óndiriske jańǵyrtylatyn energııa kózderin engizý jóninde tapsyrma berdi.
Sonymen qatar, Memleket basshysy bıyl paıdalanýǵa berilgen Aqtaý qalasyndaǵy Dostyq úıiniń qyzmetimen tanysty.
Dostyq úıinde «Qoǵamdyq kelisim» memlekettik mekemesi, óńirdegi 20 etnomádenı birlestik, oblystyq analar keńesi, Mańǵystaý oblysynyń Qazaqstan halqy assambleıasy janyndaǵy ǵylymı-saraptamalyq top, oblystyq ardagerler keńesi ornalasatyn bolady.
Qazaqstan Prezıdentine oblystyń ınvestısııalyq jobalary tanystyryldy. Atap aıtqanda, jip ıiretin jáne mata óndiretin zaýyt, Jańaózen qalasyndaǵy gaztýrbına elektr stansııasy, Quryq selosyndaǵy aýyz sý zaýyty, «MAEK KAZATOMPROM» JShS aýmaǵyndaǵy bý-gaz qondyrǵysy, Túpqaraǵan aýdanyndaǵy jel elektr stansııasy, Aqtaý ekoqalasy jáne basqa da nysandar.
