Telekópir barysynda Quryq porty men «Aqjigit - Beıneý» respýblıkalyq avtojolynyń qurylysshylary jáne «Qorǵas - Shyǵys qaqpasy» Arnaıy Ekonomıkalyq Aımaqtaǵy qurǵaq porttyń jumyskerleri baılanysqa shyqty. «QazAvtoJol» ulttyq kompanııasynyń basshysy Ermek Qızatov «Beıneý-Aqjigit-О́zbekstan» shekarasy jolynyń birinshi kezeńi iske qosylýǵa daıyn ekenin aıtty.
«Nurly jol» baǵdarlamasyn júzege asyrý aıasynda «Beıneý-Aqjigit» avtojolyn qaıta salý jumystary júrip jatyr. Bul jol Quryq porty arqyly tranzıtti arttyryp, transkaspıılik dálizdiń О́zbekstanmen jáne Ortalyq Azııanyń basqa da elderimen baılanysyn qamtamasyz etedi. Joldyń ótkizý múmkindigi táýligine qazirgi 1 myńnan 7 myń kólikke deıin jetkiziledi. Sonymen qatar, Qazaqstan-О́zbekstan shekarasyndaǵy «Tajen» shekara beketin jańǵyrtý jumystary júrip jatyr. Ondaǵy ótkizý múmkindigi eki ese joǵarylaıdy. «Beıneý-Aqjigit-О́zbekstan shekarasy» jolynyń birinshi kezeńi iske qosylýǵa daıyn. Qozǵalysty bastaýǵa ruqsat suraımyz»,- dedi «QazAvtoJol» ulttyq kompanııasynyń basshysy Ermek Qızatov.
О́z kezeginde Elbasy atalǵan jol ýchaskesinde qozǵalysty ashýǵa ruqsat berdi.
«О́zbekstan Prezıdenti Shavkat Mırzıeevtiń suraýymen jol qurylysy tezdetilip jatyr. Bul jol О́zbekstandy Qazaqstanmen qosyp, atalǵan eldiń júgin Kaspııge alyp kelýge jáne bizdiń porttardyń jumysyn jandandyrýǵa úlken yqpalyn tıgizedi. Sondyqtan, atqarǵan jumystaryńyz úshin zor rızashylyǵymdy bildiremin», - dedi QR Prezıdenti.
