Quryltaıǵa 30-dan astam halyqtardyń delegasııasy qatysyp jatyr. Sharanyń ashylý saltanatynda ejelgi «Turan» áskerı sherýi ótti. Majarstan parlamentiniń spıkeri Laslo Kever quryltaı qatysýshylaryn aýqymdy sharanyń ashylýymen quttyqtady. Quryltaıda jebe tartý jarysy, ulttyq mýzyka konserti, shaman ánderiniń keshi, ǵylymı konferensııalar ótip jatyr.
Joǵary deńgeıde uıymdastyrylǵan shara úshin Aqtóbe oblysynyń ákimi Berdibek Saparbaev minberge shyǵyp, uıymdastyrýshylar alqasyna alǵys bildirdi. Ol quryltaıǵa Qazaqstan men Majarstan arasyndaǵy jyl ótken saıyn nyǵaıyp kele jatqan tarıhı, mádenı jáne ekonomıkalyq baılanystardy eskere otyryp, Qazaqstan Prezıdentiniń tapsyrmasymen kelgenin aıtty.
Berdibek Saparbaev Qazaqstanda Túrkistan oblysynyń qurylǵany - tarıhı týrızm bazasyn qurýǵa keń múmkindikter esigin ashatynyn aıtty. Sondaı-aq, ákim Qazaqstanda ǵundardyń tarıhyn, óneri men mádenıetin zertteý ortalyǵynyń ashylýy týraly aıtyp, kelesi quryltaıdy Qazaqstanda ótkizýdi usyndy. Sondaı-aq Aqtóbe oblysy «Madııar Turan» qoryna qazaqy kıiz úıdi syıǵa tartty.
Quryltaı aıasynda uıymdastyrylǵan dóńgelek ústelge Halyqaralyq Túrki akademııasynyń prezıdenti Darhan Qydyráli, «Qasıetti Qazaqstan» ǵylymı-zertteý ortalyǵynyń basshysy Berik Ábdiǵalıuly, Gýmılev atyndaǵy Eýrazııa ulttyq ýnıversıtetiniń professory Aıbolat Kóshkimbaev qatysty. Dóńgelek ústelde Túrki akademııasynyń prezentasııasy ótip, «Rýhanı jańǵyrý» baǵdarlamasy aıasynda qurylyp jatqan «Qasıetti Qazaqstan» ortalyǵy tanystyryldy.
Halyqaralyq Túrki akademııasynyń prezıdenti Darhan Qydyráli majar sarapshylary men ǵalymdaryna Shıveet Ulaan alǵashqy túrki ǵuryptyq kesheni ornynda júrgizilgen qazba jumystarynyń nátıjesin usyndy. Berik Ábdiǵalıuly «Qasıetti Qazaqstan» kitabyn tanystyryp, Astana mańyndaǵy kóne Bozok qalasy, onyń ǵundarmen baılanysy týraly aıtty.
«Turan» halyqtar quryltaıynyń negizin qalaýshy ári ıdeıalyq dem berýshi Andrash Bıro Halyqaralyq túrki akademııasynyń altyn medalimen nagradtaldy. Halyqaralyq túrki akademııasy men «Madııar Turan» qorynyń qatysýymen ótken dóńgelek ústelde yntymaqtastyq memorandýmyna qol qoıyldy.
Otyzdan astam el delegasııasynyń basyn qosqan quryltaı eki kúnge jalǵasady. Onda ulan-ǵaıyr jerdi alyp jatqan tarıhı Turan ólkesin mekendegen halyqtardyń asa baı mádenı-tarıhı muralary kórsetiledi.
