Qyzyqty saıahattar, shym-shytyryq oqıǵalar, adrenalın men tamasha kóńil kúıdiń jalaýy bolyp tabylatyn «Adventure» Qazaqstan týraly 4 epızodty qalyń kórermenine usynýdy josparlap otyr.
Quramynda Marta Brambilla Pisoni, Thierry Winn men Dmitry Lee syndy tájirıbeli jýrnalıster bar komanda qazirdiń ózinde Býrabaı kýrorttyq aımaǵynda qazaqtyń álmısaqtan kele jatqan ańshylyq kásibi týraly kadrlardy túsirip úlgerdi. Jergilikti búrkitshiler saıatshylyq ónerimizdi kúlli álemge nasıhattaǵaly otyrǵan sheteldik áriptesterimizge ańǵa qus salýdyń túrli ádisterin kórsetip, tabıǵatynan tákappar qusty qolǵa úıretýdiń qyr-syrymen bólisti.
Qazirgi kúnderi bul komanda Alataýdyń bókterinde bilek sybanyp, túsirý jumystaryn jalǵastyrýda. Munda halyqaralyq telearna ókilderi belsendi týrızmniń múmkindikteri, ıaǵnı haıkıng, maýntaın baık pen daýnhıll týraly barynsha qamtylǵan epızodtardy jınaıdy.
Euronews NBC telearnasy jýrnalısteriniń aıtýynsha, túsirilim barysynda tamasha tabıǵı landshafttar, aspanmen talasqan Ile Alataýynyń bókteri, Almaty oblysynyń ǵajaıyp jerleri olardyń tamasha sıýjetterdi ońaı tabýyna, tabysty jumys isteýine septesip otyr.
«Qazaqstan meni óte úlken áserge bóledi. Ádemi tabıǵat, meıirimdi de qamqor adamdar bizdi qorshap tur. Demalystyń túr-túrin jaqsy kóretin týrıster úshin taptyrmaıtyn jer. Qysqasy, bul elde nemen aınalysamyn deseń de bári tabylady. Biz Almatydaǵy túsirý jumystaryn aıaqtaǵannan keıin Aqtaý qalasyna attanamyz. Ol jaqta djıp-týrlardy túsiremiz. Tezirek jetsek eken dep, taǵatsyzdanyp júrmiz», deıdi Euronews NBC telearnasynyń tilshisi Marta Pisoni.
Qysqasy, aldaǵy kúnderi «Adventure» baǵdarlamasynyń jýrnalısteri Mańǵystaý oblysyna attanady. Atalmysh baǵdarlamanyń qorytyndy sıýjeti taý shańǵysy týrızmi týraly bolmaq. Bul úshin halyqaralyq arnanyń túsirý toby Almatyǵa jeltoqsan aıynda qaıta oralady.
Aınash ESALI,
«Egemen Qazaqstan»
ALMATY
