О́mirzaq Shókeev jáne mınıstrlikten kelgen komanda aldymen Qostanaı qalasynyń irgesindegi birqatar sharýashylyqtardy aralaǵannan keıin, aýyl sharýashylyǵy aktıvimen kezdesip, májilis ótkizdi. Onda aýyl sharýashylyǵyn damytý, eksportqa ónim shyǵarý, ásirese mal sharýashylyǵyn órkendetý máseleleri qaraldy. Agroónerkásip keshenin damytýdyń memlekettik baǵdarlamasyn jańartý máselesi sóz boldy.
«Búginde ómir óte tez qarqynmen ózgerip keledi.Osyǵan oraı biz de jumys tásiline jańa kózqaras qalyptastyrýymyz qajet. Mysaly jylyna 20 mıllıon tonna astyq óndirsek, sonyń 12 mıllıon tonnasy ishki naryqqa jumsalady, qalǵanyn eksportqa shyǵarýymyz qajet. Alaıda sol 8 mıllıon tonna astyqty syrtqa satý ońaı bolyp otyrǵan joq. Burynǵy qalyptasqan syrtqy naryq biz úshin tarylyp ketken. Eger astyqty durys sata almasaq, ony óndirgennen ne paıda? Sondyqtan burynǵy dástúrli kózqaraspen qalýǵa bolmaıdy», dedi О́mirzaq Shókeev.
Aýyl sharýashylyǵy mınıstriniń orynbasary Arman Evnıev aýyl sharýashylyǵyna beriletin sýbsıdııanyń kólemi azaımaıdy, qaıta ósedi, biraq onyń sıpaty ózgeretinin aıtty. Ol sýbsıdııa endi súttiń lıtrine, eginniń gektaryna emes, aýyl sharýashylyǵynyń damýyna yqpal etetin ınvestısııalyq qarjy esebinde bolýy kerektigin aıtty.
Keńeste et eksportyn damytýǵa baılanysty mal jaıylymy, maldyń azyǵyn daıyndaý, shaǵyn, otbasylyq fermerlik sharýashylyqtardy damytý týraly da máseleler kóterildi. О́mirzaq Estaıuly Amerıka qurama shtattarynda 750 myń fermerlik sharýashylyq eldegi ettiń 80 paıyzyn óndiretinin tilge tıek etti. Sondyqtan «keńestik qatyp qalǵan kózqaras sheńberinde» qalyp qoımaı, mal sharýashylyǵyn, ásirese, fermerlik sharýashylyqtardy damytýdy mindet etip qoıatynyn aıtty.
«Qazaqstandyq et baǵdarlamasy tek fermerlerge eseptelgen», dedi mınıstr.
Názıra Járimbet,
«Egemen Qazaqstan»
Qostanaı
