Jıhankezder Jetisý Alataýyna saıahat jasaıdy

Atap aıtqanda, elimizdiń tarıhı mekenderi men tabıǵaty tańǵajaıyp óńirlerine saıahattaý jobasy boıynsha otandyq já­ne sheteldik mamandardan qu­ral­ǵan ekspedısııalyq top birne­she baǵytta saparǵa shyqty. «Uly Dala eline saıahat» atty uran­men jalaý kótergen jobanyń eki baǵyty bo­ıynsha sharalar oıdaǵydaı aıaqtaldy. Alys-jaqyn shetelden shaqyrylǵan trevel-blogerler, telejýrnalıster jáne týroperatorlardyń ókilderi jınalyp «Tıan-Shan marjandary» jáne «Altaı – órkenıet besigi» ba­ǵytynda arnaıy saıahat týrymen júrip ótti. Jalpy, bul baǵyttaǵy jumystardyń barlyǵy Astana qalasynyń 20 jyldyǵyna oraı uıymdastyrylyp otyr.

Kúni keshe týrıstik ekspedı­sııa toby úshinshi baǵyt boıyn­sha saparǵa shyqty. Bul jolǵy baǵyt – Jetisý Alataýy. Joba­ǵa qaty­sý­shylar jeti ózen bezendirgen, be­lester men taýlar qorshaǵan aý­maqtaǵy kıeli jerlerdi aralaý­dy maqsat etipti. Ekspedısııa qu­ra­mynda tanymal telejýrnalıster, jıhankez blogerler jáne kásibı saıahatshylar bar. 

Aq basty Alataýdyń Jetisý ól­kesine ornalasqan bóligin aralaýdy maqsat etken jannyń biri – shveısarııalyq fotograf-peızajshy Kaı Grossmann myrza. Dúnıe júziniń kóptegen elderinde bolyp, tumsa tabıǵattyń talaı ǵajabyn kózben kórgen káni­gi fotokóz qazaq dalasynyń kere­met­terine syrttaı qanyq eken. Ol ózine serik retinde brıtan saıahatshysy ári fotograf Djek Hardın men jıhankez-bloger Andreı Kýlagındi tańdap, ertip alypty.

Saıahatshylar aldymen «Altyn Emel» memlekettik ulttyq tabıǵı saıabaǵyna at shaldyrmaq. Osy saıabaq aýmaǵyndaǵy Besshatyr qoryq-keshenin aralamaqshy. Bul jerde sonaý saq dáýirinen beri saq­talyp kelgen kóne obalar jatyr. Osy mańdaǵy ataqty Aı­ǵaıqumǵa da arnaıy baryp, tabıǵattyń keremetine kóz qandyr­maqshy. Budan ári jer betinde 700 jylǵa jýyq ósip turǵan Áý­lıeaǵashqa da baryp, táý etýdi josparlapty. Aıtpaqshy, sheteldik saıahatshylar Shajy ózenin boılap júrip ótýge bel býypty. Bul ózende «Qyzyl kitapqa» engen Jetisý aıaqtybalyǵy mekendeıdi. Kaı Grossmann adam kózine sırek túsetin maqluqatty sýretke túsirýdi armandaıdy eken. Múmkin onyń joly bolar...

Jalpy, «Jetisý Alataýy» jobasy boıynsha saıahatqa shyqqan top jer jánnatynyń jaýharlary – Kóksý ózeninde salmen júzip, Baıanjúrek taýyna, Búıen ózenine, Burqanbulaq sarqyramasyna, sol mańdaǵy Jasylkólge, Tentek ózeni men Atapqan asýyna, Tastaý bazasy men Qoılyq qalashyǵyna da barýdy josparlap otyr. 

– Jetisý alqaby – birneshe ǵa­syrlardyń qupııasy men ańyz­daryn saqtap kele jatqan aıryqsha ólke. Bul aımaqtardan adamǵa múl­dem beımálim janýarlardy nemese adam aıaǵy baspaǵan asýlardy kezdestirýge bolady. Ejelgi temir jáne qola dáýirinen qalǵan kóptegen eskertkishter de bar. Bul ba­ǵyt kóshpeli eldiń mádenıeti men tabıǵı nysandardyń pák sulý­lyǵyna tánti bolǵysy keletin týrıs­terge óte qyzyq bolady dep oılaı­myn, – dedi jıhankezderdi saıahat saparyna shyǵaryp salý bary­synda «Kazakh Tourism» kom­pa­nııasynyń basqarma tóraǵasy Rashıd Kúzembaev.

Qalmahanbet MUQAMETQALI,

«Egemen Qazaqstan»