Qashyqtyqtan jáne kózbe-kóz qyzmet kórsetedi
Biryńǵaı jınaqtaýshy zeınetaqy qory aǵymdaǵy jyldyń 1 shildesinen bastap salymshyǵa shot ashýdan bastap, zeınetaqy tólemderin alýǵa deıingi negizgi qyzmetterdi elektrondy formatta kórsetý múmkindigine ıe boldy. Sondaı-aq qazirgi ýaqytta zeınetaqy jınaqtaryn ómirdi saqtandyrý boıynsha kompanııalarǵa aýdarý jáne erikti jarnalar boıynsha tólemder alý sekildi onlaın-servıster ázirlenip jatyr. Alaıda ázirge elektrondy servıster qataryna shetelge turaqty turýǵa ketýge baılanysty tólemder, jerleýge jáne muragerlerge beriletin tólemder osy qyzmetter boıynsha qujattar usynýdyń ereksheligine baılanysty engizilmeı otyr.
Atalǵan máselelerdi qor qyzmetiniń jarty jyldyq qorytyndysy boıynsha ótken máslıhatta qordyń basqarma tóraıymy N.Naýryzbaeva málimdegen bolatyn. Onyń aıtýynsha, aldaǵy ýaqytta elektrondy sıfrly qoltańbaǵa ıe bola otyryp, qor saıtynyń «Elektrondy qyzmet kórsetý» bóliminde jeke zeınetaqy shotyn ashý jóninde ótinish berýge, jeke zeınetaqy shotynan úzindi-kóshirme alýǵa, jeke derektemelerge ózgerister engizýge, ınternet habarlandyrýdy tańdaı otyryp aqparat alý tásilin ózgertýge, zeınetaqy tólemderin taǵaıyndaý jóninde ótinish joldap, onyń oryndalý barysyn qadaǵalaýǵa bolady.
«Odan bólek aǵymdaǵy jyldyń alǵashqy jartysynda jańa «Jeke zeınetaqy shotyn ashý jónindegi ótinishtiń kóshirme-nusqasyn alý» elektrondy qyzmeti, sondaı-aq «Erikti zeınetaqy jarnalary esebinen óz paıdasyna shart jasasý» servısi ázirlenip iske qosylǵan. Sonymen qatar Biryńǵaı jınaqtaýshy zeınetaqy qory 2018 jyldyń mamyrynda tanymal Telegram messendjeri úshin óziniń botyn qoldanysqa engizdi. Paıdalanýshylar jańa qyzmettiń kómegimen qysqa úzindi-kóshirme alý nemese úzindi-kóshirmeni elektrondy poshtasyna jiberý, jeke kabınetke kirý, qupııa sózin qaıta qalpyna keltirý, qordyń mańyzdy jańalyqtary jáne aǵymdaǵy kórsetkishterimen tanysý, sondaı-aq onyń eń jaqyn bólimshesin tabý múmkindigine ıe bolady», deıdi N.Naýryzbaeva.
Joǵaryda atalǵan jıynda sóz bolǵandaı, 2018 jyldyń alǵashqy jartysynda elektrondy arnalar arqyly 7,5 mln qyzmet kórsetilgen. Bul eseptik kezeńde kórsetilgen qyzmetterdiń jalpy kóleminiń 72 prosentin quraıdy. Osy rette qor keńselerinde jáne kóshpeli qyzmet kórsetý barysynda 2,9 mln operasııa oryndalǵandyǵyn da aıta ketkenimiz jón.
Jalpy, elektrondy servısti engizý jáne damytý qor qyzmetin jańa deńgeıge kóterýge múmkindik beredi. Búginde elimizdegi qor qyzmetiniń basym bóligi qashyqtyqtan kórsetiledi. Qyzmet kórsetý sapasynyń joǵary deńgeıde ekendigin halyqaralyq sarapshylar da rastap otyr. Bıyl naýryz aıynda «BJZQ» AQ sapa menedjmenti júıesi boıynsha sertıfıkasııalyq aýdıtten sátti ótti. Aýdıtti aldyńǵy qatarly eýropalyq kompanııalardyń halyqaralyq aýdıtorlary júrgizdi.
3 aı ishinde 75 saparǵa shyqty
Zeınetaqymen qamsyzdandyrý elimizde turatyn barlyq azamattarǵa, sheteldikter men azamattyǵy joq adamdarǵa, olardyń ishinde shalǵaıda ornalasqan kishigirim eldi mekenderdiń turǵyndaryna da qatysty. Osyǵan baılanysty shalǵaıda ornalasqan eldi mekenderde, sondaı-aq qor bólimsheleri joq aýdandarda zeınetaqy qyzmetteriniń qoljetimdiligin qamtamasyz etý maqsatynda «Mobıldi keńse» jobasy iske qosyldy. Atalǵan joba sońǵy úsh aı ishinde 75 ret jolǵa shyqsa, sońǵy alty aıda 3,9 myń kóshpeli shara uıymdastyryp, 93,4 myń operasııany júzege asyrdy.
Bul týraly «BZJQ» basqarma tóraıymynyń orynbasary S.Egeýbaeva halyqqa keńinen túsindirgen bolatyn. Búginde «Mobıldi keńse» jobasy Almaty, Atyraý jáne Qostanaı oblysynda júzege asyrylyp jatyr. «Mobıldi keńse» jobasyn aǵymdaǵy jyly Shyǵys Qazaqstan, Batys Qazaqstan jáne Ońtústik Qazaqstan oblystarynda iske qosý boıynsha uıymdastyrý jumystary júrgizilý ústinde. Al kelesi jyly jobany qordyń Qaraǵandy, Qyzylorda, Aqtóbe, Aqmola, Jambyl, Pavlodar jáne Soltústik Qazaqstan oblystyq fılıaldarynda júzege asyrý jumystary jandanbaq.
«Osy saparlar barysynda qor qyzmetkerleri 5,1 myńnan astam adamǵa qyzmet kórsetip, 6,3 myńnan astam operasııany oryndady. Sonymen qatar kóshpeli qyzmet kórsetý barysynda 2,3 myńnan astam jergilikti turǵynǵa aqyl-keńes berildi», deıdi tóraıym orynbasary.
Budan basqa, «BJZQ» AQ zeınetaqy qyzmetteriniń qoljetimdiligin arttyrý maqsatynda «Biryńǵaı jınaqtaýshy zeınetaqy qory» aksıonerlik qoǵamy men «Qazposhta» aksıonerlik qoǵamy arasynda yntymaqtastyq jáne sharalar jospary týraly Memorandýmǵa qol qoıǵandyǵyn aıta ketkenimiz jón. Jalpy, jyl sońyna deıin respýblıka óńirlerin zeınetaqy qyzmetterimen qamtý kórsetkishi 11 prosentke ulǵaımaq.
Zeınetaqyny josparlaýǵa kómektesti
Biryńǵaı jınaqtaýshy zeınetaqy qory aǵymdaǵy jyldyń sáýir aıynan bastap jeke jáne korporatıvtik zeınetaqy kalkýlıatoryn qoldana otyryp, salymshylarǵa bolashaq zeınetaqyny josparlaý boıynsha aqyl-keńes berip keledi. Aıtalyq, úsh aı ishinde zeınetaqyny josparlaý máseleleri boıynsha kelýshilermen 118 517 keńes ótkizildi. Qordyń baspasóz qyzmetiniń málimdeýinshe, aqyl-keńesterdiń basym bóligin Almaty qalasynyń turǵyndary men qonaqtary alǵan. Olarǵa 18 270 konsýltasııa berilse, Túrkistan jáne Pavlodar oblystarynda sáıkesinshe 16 011 jáne 7 881 azamatqa aqyl-keńes berildi.
Osyndaı sharalar barysynda negizinen, salymshylardy zeınetke shyǵý merzimi, jarnalardy óz betinshe tóleý múmkindigi, ınvestısııalyq tabys, zeınetaqy jınaqtarynyń saqtalýyna memleket tarapynan beriletin kepildik, zeınetaqy mólsheri jáne ony kóbeıtý joldary jaıyndaǵy máseleler mazalaıtyndyǵy anyqtalǵan.
Baıqaǵanymyzdaı, BJZQ-nyń túrli qyzmetteri eldiń ıgiligi men ıkemdiligine negizdelip jasalyp otyr. Tek qolaıly tetikterdi tez meńgerip ketý jetkilikti. Osy oraıda aǵymdaǵy jylda zeınetaqy túsimderiniń somasy ósip jatqandyǵyn da aıta ketken abzal. Jyl basynan beri zeınetaqy túsimi 407,5 mlrd teńgeni qurap, ótken jyldyń sáıkes kezeńimen salystyrǵanda 11 prosentke kóbeıgen.
Mıras ASAN,
«Egemen Qazaqstan»
