Qaraǵandydaǵy «Dostyq úıinde» tusaýy kesilgen óner jarysynda 23 sýretshi men músinshiniń 47 jumysy básekege tústi. Avtorlardyń bári de óz týyndylarynda Buqar jyraýdyń zamanynda ulttyń sózin aıtqan ór tulǵa retindegi obrazyn jan-jaqty ashyp kórsetýge umtylǵan. Baıqaýda baq synaǵan jas sýretshiler men músinshilerge esimi elge tanylǵan Mádihan Qalmahanov, Qanysh Balabekov, Evgenıı Shýls, Dáýlet Izbasaruly, Manatbek Amanbaev, Iýrıı Ký syndy sheberlermen básekege túsý ońaı bolmady. Degenmen olar úshin bul baıqaýdyń zor tájirıbe mektebi bolǵany anyq.
– Buqar jyraý – ár qazaqtyń maqtanyshy. Baıqaýǵa usynylǵan jumystardyń barlyǵy da joǵary deńgeıde oryndalǵan. Sondyqtan jeńimpazdy anyqtaý bizge ońaıǵa túspedi, – dep atap ótti qazylar alqasynyń tóraǵasy, Qazaqstannyń eńbek sińirgen óner qaıratkeri Beıbit Mustafın.
Kórme-baıqaýdyń qorytyndysy boıynsha bas júlde «Buqar jyraý» dep atalǵan lınogravıýrasy úshin belgili sýretshi Manatbek Amanbaevqa buıyrdy. Grafıka óneriniń has sheberi bul synǵa segiz týyndydan turatyn serııalyq jumysyn usynǵan eken. «Men Abylaı han men Bógenbaı batyrdyń erlik isterin jyrlaǵan Buqar jyraýdy óz zamanynyń uly jarshysy retinde kórsetýge tyrystym», – dedi marapattaý kezinde jeńimpaz.
«Kórkem sýret» atalymy boıynsha birinshi oryn Mádihan Qalmahanovqa berilse, «Músin» atalamynda Amantaı Ákishevtiń jumysy úzdik bolyp tanyldy. Sonymen qatar «Sándik-qoldanbaly óner» syny boıynsha Evgenıı Shýls ozyp shyqsa, Natalıa Jılkına «Grafıka» nomınasııasynda jeńimpaz atandy.
«Rýhanı jańǵyrý» baǵdarlamasy aıasynda uıymdastyrylǵan bul kórmeni kelýshiler 15 tamyzǵa deıin tamashalaı alady.
Qaırat ÁBILDA,
«Egemen Qazaqstan»
