Bıyl onyń tikeleı bastamasymen ishki ister organdarynyń qyzmetkerlerine arnalǵan 100 páterli turǵyn úıdiń qurylysy bastalyp ketti. Ol úshin jergilikti atqarýshy organdardyń kómegimen «Jas О́rken» yqsham aýdanynan jer telimderi bólindi.
«Jaıly baspanamen qamtamasyz etý óńir tártip saqshylaryna áleýmettik qoldaý kórsetýdiń mańyzdy baǵyttarynyń biri bolyp tabylady. Búgingi tańda 300-den astam polısııa qyzmetkeri páter kezeginde tur. Turǵyn úı qurylys jınaq banki, «Qazaqstan ıpotekalyq kompanııasy» IU arqyly jeńildikpen nesıe alý múmkindikterin de qarastyryp otyrmyz», degen Berik Sultanǵazyuly osy máselege jaýapty mamandarǵa memlekettik baǵdarlamalardyń barlyq tarmaqtaryn muqııat zerdeleý qajettigin tapsyrdy.
Polısııa basshylyǵynyń josparynda jańa jataqhana salý da oılastyrylǵan. Qazirgi ýaqytta qajetti qujattar resimdelip, tıisti oryndarǵa jiberildi. Byltyr paıdalanýǵa berilgen birinshi vedomstvolyq jataqhanada 43 polıseı jáne 60 otbasy múshesi turady. Olar buǵan deıin qymbat baspana jaldap kelse endi kommýnaldyq qyzmetterge ǵana tólem jasaıdy.
Jýyrda jedel ýákil Ǵalııa Ibraeva «Qazaqstan ıpotekalyq kompanııasy» ıpotekalyfq uıymy arqyly eki bólmeli páterge qol jetkizdi. Polısııa podpolkovnıgi Rýslan Toǵaev, kadr jumysy bóliminiń ınspektory Saıan Moljigitiv te osyndaı qýanyshqa ıe boldy.
Jyl basynan beri tártip saqshylary «Nurly jer» memlekettik baǵdarlamasy sheńberinde 48 páterge qonystandy.
О́mir ESQALI,
«Egemen Qazaqstan»,
Soltústik Qazaqstan oblysy
