Kóshpeli jurt ókilderiniń basyn qosqan aıtýly sharaǵa Qazaqstan, Túrkııa, Ázerbaıjan, Qyrǵyzstan, Bashqurtstan, Daǵystan sııaqty álemniń 30-dan astam elinen delegasııa qatysty. Osy jıyn aıasynda respýblıkalyq «Egemen Qazaqstan» gazeti men «QazAqparat» halyqaralyq aqparat agenttiginiń, sondaı-aq Halyqaralyq Túrki akademııasynyń qoldaýymen Qazaqstannyń Vengrııadaǵy elshiligi uıymdastyrǵan «Uly Dala rýhy» fotokórmesi ashyldy.
Týysqan elderdegi ózara mádenı jáne dostyq baılanystardyń jarqyn úlgisine aınalǵan dástúrli quryltaı bıyl onynshy ret uıymdastyrylyp otyr. Quryltaıdyń ashylý saltanatynda ejelgi «Turan» áskerı sherýi ótip, kóshpelilerdiń jaýyngerlik dástúri jańǵyrtyldy.
Joǵaryda aıtyp ótkenimizdeı, quryltaıda respýblıkalyq «Egemen Qazaqstan» gazeti men «QazAqparat» halyqaralyq aqparat agenttiginiń, sondaı-aq Halyqaralyq Túrki akademııasynyń qoldaýymen Qazaqstannyń Vengrııadaǵy elshiligi «Uly Dala rýhy» fotokórmesin uıymdastyrdy.
Astananyń 20 jyldyǵyna arnalǵan kórmede «Egemen Qazaqstan» gazeti men «QazAqparat» HAA-nyń Erlan Omarov, Muhtar Holdorbekov, Vıktor Fedıýnın, Aleksandr Pavskıı jáne Ilzat Safargalıev syndy fototilshileriniń tańdaýly jumystary kóptiń nazaryna usynyldy. Qazaqstannyń baı tarıhy men búgingi qaıtalanbas kelbetinen syr shertetin fotosýretterge quryltaı qatysýshylary men qonaqtar erekshe qyzyǵýshylyq bildirdi. Kórmege arnaıy qatysqan Majarstan parlamentiniń vıse-spıkeri Shandor Lejak joǵary deńgeıde ótken shara úshin uıymdastyrýshylar alqasyna rızashylyǵyn bildirdi. Budan bólek, Býgas shaǵyn aýdanyndaǵy eki kúnge sozylǵan quryltaı alańy teatrlandyrylǵan san alýan shoý-baǵdarlamalar men túrli etnotoptardyń án salýymen, arheologııalyq-antropologııalyq kórmeler men kózdiń jaýyn alar qolóner jármeńkesimen tolyǵa tústi.
Aıa О́MIRTAI,
«Egemen Qazaqstan»
