Respýblıkamyzdyń batysyndaǵy úlken shaharda turǵyndar sany da jarty mıllıondyq mejeden asyp otyr. Áıtse de ásem qalanyń sıqyn ketirip júrgen bir jaıt bar. Aqtóbe kólik-logıstıka qyzmeti oń jolǵa qoıylǵan óńirdiń biri bolǵandyqtan, mundaǵy qozǵalys kóp oryndardyń biri – temir jol vokzaly. Bul jerden poıyzdar kún saıyn elimizdiń ár qıyryna jáne Reseı men Ortalyq Azııa respýblıkalaryna qaraı ersili-qarsyly ótip jatady.
Sol poıyzdardan aglomerasııa ortalyǵy ári respýblıkamyzdaǵy tórtinshi megopolıs atanýǵa laıyqty qala Aqtóbe vokzalyna túsetinder de jetkilikti. Buǵan qosa Aqtóbe qalasynda respýblıkanyń jáne halyqaralyq deńgeıde ótetin ártúrli mártebeli jıyndarǵa keletinder men qala qonaqtary qanshama? Olardyń perronnan jáne Aqtóbe temir jol vokzaly ǵımaratynyń aldynan eń aldymen kezdestiretini kimder deseńizshi? Ashyǵyn aıtqanda, maskúnemder men qańǵybastar.
Bet-aýyzdary kús-kús bolyp jarylyp, azyp-tozyp ketken álgiler árli-berli ótken jolaýshylarǵa alaıa qaraǵanda, janyńyzdy qoıarǵa jer tapaı qalasyz. Olardyń kez kelgen ýaqytta domalaı ketip, qor ete qalatyn mekenderi de poıyzdan túsken jolaýshylardyń vokzal alańyna qaraı ótetin temir qaqpanyń tusy. Kúndiz-túni Aqtóbe temir jol vokzaly mańaıyn torýyldap júretin maskúnemder men qańǵybastar bir-birimen shekisip, balaǵattasyp, judyryqtasyp jatady. Aıqaı-shý men ıtjyǵys tóbeles te osy jerde. Buǵan da jolaýshylardyń kózderi úırenip ketken sekildi. Onyń bárin ádettegi, qalypty kórinisteı kóretini baıqalady.
Sondaı-aq vokzaldyń qalaǵa kireberis tusynda irkes-tirkes, árqaısysy qurqyltaıdyń uıasyndaı dámhanalar ornalasqan. Bul jerde de tártip joq. Maskúnemder men qańǵybastar jolyńyzdy kes-kestep, alaqan jaıyp aldyńyzdan shyǵady. Biz osy arada bir jolaýshynyń iship otyrǵan tamaǵyn ala qashqan qańǵybas qazaq áıelin kezdestirip, jaǵamyzdy ustadyq.
Bir tańǵalarlyǵy, Aqtóbe temir jol vokzalynda oryn alǵan osyndaı keleńsizdikterdi retteýge eshkim kóńil aýdarmaı keledi. Abaı atamyz aıtqandaı «baıaǵy jartas, sol jartas» kúıinde qalyp otyr. Mundaı sátte jan-jaǵyńyzǵa qarap ishki ister organynyń ókilderin izdeıdi ekensiz. Al polısııa qyzmetkerleri vokzal mańynan kórine bermeıdi. Nege? О́ıtkeni qańǵybastarmen alysyp-julysyp jatý olar úshin de tıimsiz bolsa kerek. Aqtóbe temir jol vokzaly mańynan ózimiz kórip júrgen belgili turaǵy joqtardyń deni qol-aıaqtary balǵadaı, tepse temir úzetin jandar. Deni – qandastarymyz. Taǵy da uly Abaıdyń sózimen aıtqanda, «adam balasyn azdyratyn jumysy joqtyq» ekenin alǵa tartqymyz keledi. Olardyń betin keri qaıtarýdyń bir joly «eki qolǵa bir kúrek» taýyp berý emes pe eken? Bul másele eńbekke ornalastyrý jónindegi jergilikti qurylym ókilderin oılandyrýǵa tıis.
Temir QUSAIYN,
«Egemen Qazaqstan»
