Sharanyń maqsaty – búginde umyt bolyp, kóptiń kóńilinen shyqqan ulttyq qundylyqtardy nasıhattaý. Urpaqtan-urpaqqa amanat bolǵan halyq qazynalarynyń úlgisin kópke kórsetý úshin atalǵan sharaǵa Túrkistan oblysy Saryaǵash qalasynyń «Domalaq ana» ájeler toby arnaıy kelip qatysty. Shara barysynda rýhanı muralarymyzdy zertteý, saqtaý men jańǵyrtý boıynsha kórme, sheberlik sabaqtary, «Umyt qalǵan ánder» konserttik baǵdarlamasy, «Dástúrińdi saqtaı bil» sahnalyq qoıylymy uıymdastyryldy.
Búginde kúni el arasynda umyt bolyp bara jatqan salt-dástúr, yrym-tyıym qaǵıdalary men qolóner jumystaryn tanystyrǵan elorda qonaqtary da barynsha ashylyp, kórermendermen syrlasa ketti. Saryaǵash qalasyndaǵy ólkelik murajaıdyń meńgerýshisi Gúljahan Shegebaeva: «Biz óz óńirimizdegi qolóner isiniń sheberlerin arnaıy alyp keldik. Sonymen qatar aýylda saqtalyp qalǵan salt-dástúrler bizdiń qazaqy bolmysymyzdyń ózegi. Biz odan aıyrylmaýymyz kerek. Qazaq qashanda saltymen, dástúrimen qazaq bolyp qalady. Sol sebepti ıgi tarıhymyzdy nasıhattaý úshin Ulttyq mýzeıdiń shaqyrtýyn qabyl alyp keldik. Bul biz úshin úlken mártebe. Osynda kelgen ájeler ansambli qazaqtyń umyt bola bastaǵan halyq ánderin de oryndaıdy. О́tkenin ulyqtaǵan ult utylmaıdy», dep aqjarma sózin aıtty.
«Halyq qazynasy» ǵylymı-zertteý ınstıtýtynyń bul ıgi bastamasy áli de jalǵasyn tappaq. Rýhanı jańǵyrý baǵdarlamasynyń aıasynda elimiziń ár tarapynan qazyna keýde úlkenderimizdi shaqyryp, osyndaı kezdesýler men keshter jalǵasyn tabady dep senemiz.
Baǵashar TURSYNBAIULY,
«Egemen Qazaqstan»
