Kezdesý barysynda Memleket basshysyna «Samuryq Qazyna» aksıonerlik qoǵamynyń bıylǵy 7 aı ishindegi qyzmetiniń nátıjeleri men aldaǵy kezeńdegi josparlary jóninde málimet berildi.
– Birinshi jartyjyldyqtyń negizgi kórsetkishteri jaqsy. О́zińiz bekitken Qor strategııasyn júzege asyrý maqsatymen belgili bir jumystar atqarylyp, birqatar nátıjelerge qol jetkizildi. Sonyń ishinde, holdıngti transformasııalaý isi jalǵasýda, jekeshelendirý aıasynda 42 mıllıard teńge kólemindegi 18 aktıv iske asyryldy. Osy jyldyń aıaǵyna deıin «Qazaqtelekom», «Air Astana» jáne «Qazatomónerkásip» kompanııalaryn IPO-ǵa shyǵarýdy josparlap otyrmyz, – dedi Ahmetjan Esimov.
Nursultan Nazarbaev Qordyń satyp alý kólemin básekelestik ortaǵa berýdiń mańyzdylyǵyna toqtalyp, atqarylǵan jumystardyń shaǵyn jáne orta bıznesti qoldaý isindegi oń nátıjelerin atap ótti.
Sońynda Memleket basshysy «Samuryq Qazyna» aksıonerlik qoǵamy qyzmetiniń tıimdiligin arttyrý jóninde birqatar tapsyrma berdi.
