Álemniń eń úzdik oıynshylary kóshin Qytaıdyń qos sańlaǵy – Fan Chjendýn men Sıýı Sın bastap tur. Búgingi tańda bul sportshylardyń dańqy dúrkirep tur. Atap aıtsaq, 21 jastaǵy Fan Chjendýn – álemniń tórt dúrkin chempıony jáne sol jarystyń úsh márte júldegeri. Álem kýbogyn úsh márte oljalap, 2014 jyly Inchhonda ótken Azııa oıyndarynda bir altyn men qos kúmis medaldi ıemdendi. 28 jastaǵy Sıýı Sın bolsa, Rıo Olımpıadasynyń komandalyq saıysynyń jeńimpazy, álem chempıonatynda toǵyz ret top jaryp, úsh ret júlgerler qataryna qosyldy. Álem kýbogynda jeti márte teńdessiz dep tanylyp, Azııa oıyndarynda bas júldeniń ekeýin óz qanjyǵasyna baılady.
Úshinshi orynǵa taban tiregen germanııalyq Tımo Bollda óte myqty oıynshy retinde ózin áldeqashan moıyndatqan. 37 jastaǵy ardager tennısshisi sońǵy úsh Olımpııa oıyndarynyń komandalyq saıysynda júlde aldy. Sońǵy 16 jylda uıymdastyrylǵan álem chempıonattaryna úzdiksiz qatysyp júrgen ol aıtýly jarysty alty kúmis jáne eki qolamen qorytyndylady. Álem kýbogynda eki ret altyn tuǵyrǵa kóterilip, Eýropa birinshiliginde 17 márte dara shyqty.
Sonymen qatar, úzdik on oıynshynyń sanatyna qytaılyq Lın Gaoıýan, germanııalyq Dmıtrıı Ovcharov, japonııalyq Tomakadzý Harımoto, qytaılyq Ma Lýn, koreıalyq Lı San Sý, brazııalııalyq Hıýgo Kalderano jáne gonkongtyq Von Chýn Tın syndy sańlaqtar enip otyr. Esimderi atalǵan osy jigitterdiń barlyǵy da asa iri halyqaralyq dodalarda júlde alyp júrgen saqa sportshylar.
Jalpy erlerdiń eń ozyq 50 tenıısshisi qatarynda Japonııanyń – 9, Germanııanyń – 7, Qytaıdyń – 6, Ońtústik Koreıanyń – 5, Taıpeıdiń – 4, Fransııa, Portýgalııa, Shvesııa, Úndistannyń – 2, Gonkong, Nıgerııa, Danııa, Egıpet, Ýkraına, Qazaqstan, Horvatııa, Ispanııa, Anglııa, Brazılııa jáne Avstrııanyń –1 ókili bar.
Áıelder reıtınginde de Qytaı ózgelerden qara úzip tur. Aspanasty eliniń úsh arýy álemdik reıtıngte aǵaryp alda keledi. Olar – Jý Iýlın, Lıý Shıven jáne Chen Men. Qytaıdyńs taǵy úsh qyzy – Van Man Iý (5 oryn), Dın Nın (7 oryn) jáne Chen Sın Týn (10 oryn) úzdik ondyqtyń sanatyna erkin enip otyr. Sondaı-aq, bul tizimde japonııalyq Kasýmı Ishıkava (4 oryn), Mıma Ito (6 oryn), Mıý Hırano (9 oryn) jáne taıpeılik Chen I-Chın (8 oryn) syndy sulýlar bar.
Áıelder arasyndaǵy «TOP-50» tennısshiniń qataryna Japonııanyń – 12, Qytaıdyń – 8, Ońtústik Koreıa, Gonkong, Sıngapýrdyń – 3, Taıpeı, Rýmynııa, Gollandııa, Germanııa, Avstrııanyń – 2, Kanada, Shvesııa, Polsha Portýgalııa, Vengrııa, Pýerto-Rıko, Taıland, Lıýksembýrg, Egıpet, Soltústik Koreıa jáne Reseıdiń –1 ókili qosylyp otyr. О́kinishke qaraı, Qazaqstan quramasy sapyndaǵy qyzdardyń qarqyny óte baıaý. Jerlesterimizdiń arasynan eń úzdik kórsetkish Álııa Kelmenbetova men Záýresh Aqashevaǵa tıesili. Olar ázirge 350 jáne 375 oryndardy qanaǵat tutýda.
Ǵalym SÚLEIMEN,
«Egemen Qazaqstan»
Almaty
