1 qyrkúıekten bastap, qazaqstandyq stýdııanyń júzden astam fılmnen turatyn katalogy búkil álemge qol jetimdi bolady. Baspasóz otyrysyndaǵy spıkerler: «Qazaqfılm» atynan satý jáne marketıng sektory jetekshisiniń mindetin atqarýshy Janna Manabaı, atalǵan sektordyń menejderi Marjan Beıbitova, baspasóz qyzmetiniń jetekshisi Aınur Isaeva jáne MEGOGO kompanııasy atynan Vıdeoservıstiń Ortalyq Azııadaǵy keńsesiniń bas dırektory Nurlan Chýkýbaev boldy.
Vıdeoservıstiń Ortalyq Azııadaǵy keńsesiniń bas dırektory Nurlan Chýkýbaev: «MEGOGO-diń kontent saıasatynyń bir baǵyty – jergilikti óndirilgen fılmderdiń kórsetilimi. Buǵan áleýmettik suranys bar jáne mádenı mańyzy da bar,» -dedi. «Sońǵy jyldardaǵy qazaqstandyq fılmder álemdik deńgeıde moıyndaýǵa laıyqty. Bizde kórsetetin dúnıe bar. Eger barlyq fılm sheteldik kınoteatrlarda kórsetilmese, jınaqtalǵan katalogqa kórermen onlaın túrde qol jetkize alady. Onyń ústine, katalog HH ǵasyrdyń shedevrlerine toly,» - dep Nurlan Chýkýbaev erekshe atap ótti.
Qazirgi ýaqytta «Qazaqfılm» AQ-nyń onlaın-kınoteatrǵa usynǵan ulttyq kınomuraǵatynda 150 fılm bar. Onyń ishinde 148 kórkem fılm, 1 derekti fılm («Mádenı mura» atty 10 serııalyq sıkl), 1 serıal («Astana – mahabbatym meniń» kóp serııaly fılm) bar. Qol jetimdi kartınalar platformasynda qazaq kınosynyń altyn qoryna engen: «Meniń atym Qoja», «Qyz-jigit», «Bizdiń súıikti dáriger», «Taqııaly perishte», «Kókserek», «Qyz Jibek» jáne t.b. kóptegen fılmder bar. 2018 jyldyń 28 shildede jasalǵan kınostýdııa men MEGOGO vıdeoservısiniń arasyndaǵy kelisim-shartqa sáıkes kontentti paıdalaný aqyly bolady. «Qazaqfılmniń» kontentin ornalastyrýdan basqa kelisim-shart negizinde MEGOGO vıdeoservısinde kınostýdııanyń jobalaryna aqparattyq qoldaý kórsetiledi, sondaı-aq osy vıdeokontentti lısenzııasyz qoldanýǵa qarsy kúresti qamtasyz etedi.
«Kınostýdııa óndirgen fılmderge ınternet jelisinde suranys bar. Sondyqtan da biz atalǵan vıdeoservıske kontentimizdi shyǵaryp otyrmyz. Fılmder qazaq jáne orys tilderinde qol jetimdi bolady. Bul jobanyń iske asýy qazaq kınosyn nasıhattaýda mańyzy zor dep bilemiz», dedi «Qazaqfılm» AQ baspasóz qyzmetiniń jetekshisi Aınur Isaeva.
MEGOGO-diń bir aıdaǵy aýdıtorııasyn 40 mln. paıdalanýshy quraıdy. Resýrs katalogynda 77 000 vıdeo bar: 5000 kórkem fılm jáne serıal, 1500-den astam mýltfılm, shamamen 45 000 televızııalyq shoý, konsertter men mýzykalyq vıdeo, sondaı-aq 20 000 jańalyq baǵdarlamasy bar.
