Jeńisterge bastaǵan jeńilister bolmasa, jetistikterdiń qadiri qanshalyqty qundy bolar edi? Egemendiktiń bederinde eki dúrkin Olımpıada chempıony (ózim úshin áli solaı) atanǵan Ilıa Ilınniń jetkinshek kúninen qalǵan myna sýretti kórip otyryp, osy bir qas-qaǵym sáttiń jan tolqytar tarıhy baryn bilgende aıaqastynan altyn taýyp alǵandaı qýanyshymyz eselene tústi.
– 1998 jyly Almatyda jasóspirimder arasynda aýyr atletıkadan respýblıkalyq chempıonat ótti. Ul balalardyń arasyndaǵy el birinshiligi SSKA-da uıymdastyryldy. Men ol kezde QazTAG fototilshisimin. Osy sporttyq sharadan bizge reportaj jasaýǵa tapsyrma berilgen. Armııashylar klýbynyń Ortalyq stadıonyna kelsek, qatysýshylar sanynyń azdyǵynan jarys ýaqytynan buryn aıaqtalyp ketipti. Stadıonda adam joqtyń qasy.
Qarasam buryshta bir bala jylap otyr. Ákesi janynda jubatyp tur. Kórsetkishi sál tómen bolyp, ekinshi oryn alyp qalǵan eken.
– Atyń kim, balaqaı? – dedim jaqyndap.
– Ilıýsha.
– Famılııań?
– Ilın, – dedi ol qorsyldaǵan tanaýyn tartyp.
– Qane, shtangaǵa otyr. Jylama! Áli-aq Álem chempıony bolasyń, – dedim arqasynan qaǵyp.
– Sýrettegideı Ilıa shtangada kóńilsiz otyrdy. Men shyrt etkizip fotoǵa túsirip aldym. Bul sýret «Kazahstanskaıa pravda» gazetiniń birinshi betinde jaryq kórdi.
– Ekinshi oryn alǵan bala respýblıkalyq basylymnyń birinshi betine qalaı shyqty?
– Aıtyp otyrmyn ǵoı. Bul respýblıkalyq iri sporttyq jarys bolatyn. Biz barǵanda jarys aıaqtalyp, jurt tarap ketkendikten gazettiń birinshi beti Ilıaǵa buıyrdy. Keıin Ilıa Ilın jyldar óte kele, 2006 jyly Qytaıda ótken jastar arasyndaǵy álem chempıonatynan jeńispen oralǵanda, áýejaıdan qarsy alǵan BAQ ókilderimen birge baryp, quttyqtadym, – deıdi elimizdegi eń baıyrǵy fototilshilerdiń biri Iýrıı Bekker.
– Aıttym ǵoı saǵan, kórdiń be Álem chempıony boldyń! – dedim Ilıaǵa.
– Al men sizdi kóp jyldan beri izdep júrmin. Aty-jónińizdi de sol kezde surap, jazyp almappyz. Baıaǵyda gazetke shyqqan fotony anam ba, aǵam ba, qıyp alyp qoıǵan eken, Qyzylordadaǵy úıimniń qabyrǵasynda ilýli tur, – dedi ol qýana qushaqtap.
Sodan beri belgili fototilshi Iýrıı Bekker men sport sańlaǵynyń dostyǵy berik desek te bolady.
Oraıy kelip turǵanda, qorjyny el shejiresine toly Iýrıı Bekker jeltoqsan oqıǵasy kezinde túsirilgen áıgili sýretterimen de tanymal ekenin aıta ketelik. Jáne bul jumystary úshin az taıaq jemegen...
Osylaısha Álemniń úzdik aýyr atleti, eki dúrkin Olımpıada chempıony, úsh dúrkin álem chempıony, Qazaqstannyń eńbek sińirgen sport sheberi atanǵan Ilıa Ilın bıyl orda buzar 30 jasqa toldy.
Aınash ESALI,
«Egemen Qazaqstan»
ALMATY
