Aqtóbe, Qaraǵandy oblystarynan at arytyp arnaıy kelgen alpınısterge osy jaqtaǵy áriptesteri men eriktiler toby qosylyp, barlyǵy otyzdan astam adam quzar shyńǵa attanǵan-dy. Bıik shyńdardy baǵyndyrýǵa bel býǵandardyń maqsaty – Elbasynyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda keńestik kezeńde túrli ataýǵa ıe bolǵan shyńdarǵa Tóle, Qazybek jáne Áıteke bılerdiń esimderi jazylǵan tas ornatyp, tý tigý ǵana emes edi. Iаǵnı Túrkistan oblysyndaǵy «Saıram-О́gem» MUTP aýmaǵynda ótken taý festıvaliniń maqsaty – ishki sporttyq-ekologııalyq týrızmdi damytý, oblystyń týrıstik áleýetin nasıhattaý jáne «Rýhanı jańǵyrý» baǵdarlamasyn júzege asyrý. Bıikke kóterilgenderdiń maqsatqa jetýdegi tabandylyǵy men tózimdiliginiń nátıjesinde shyńdarǵa tas ornatylyp, tý tigildi.
Naqtyraq aıtsaq, oblystaǵy 3 bıik shyńnyń ataýy ózgerdi. Buryn «pık Stýdentov» (3750 m) dep atalǵan shyń endi Áıteke bı shyńy dep atalsa, «Kergelı ýzlovaıa» (3787 m) shyńyna Qazybek bıdiń esimi berildi. Al, «Roshına» (3860 m) shyńy endi Tóle bı shyńy dep atalady. Festıvaldi qorytyndylaý rásiminde Túrkistan oblysy ákiminiń orynbasary Erbol Tasjúrekov «Rýhanı jańǵyrý» baǵdarlamasy aıasynda ótken festıvaldyń mańyzdylyǵyna toqtalyp, alpınısterdi Alǵys hatpen marapattady. Al oblystyq alpınıster federasııasynyń prezıdenti Baqytjan Asanov týrızmdi damytý baǵytyndaǵy mundaı bastamalar aldaǵy ýaqytta da jalǵasatynyn atap ótti. Sondaı-aq festıval barysynda velosherý, ulttyq oıyndardan saıystar, konserttik baǵdarlama uıymdastyryldy.
Aıta ketelik, buǵan deıin festıval aıasynda alpınıster bastaǵan eriktiler toby О́gem taý jotasynyń shyǵys jaǵynda ornalasqan taýǵa shyǵyp, oǵan «Qazaqstan halqy Assambleıasynyń 20 jyldyǵy shyńy» (bıiktigi 3535 m) ataýy berilgen, elimizdiń Kók baıraǵy men Assambleıa týyn jelbiretken bolatyn.
Ǵalymjan ELShIBAI,
«Egemen Qazaqstan»
Túrkistan oblysy
