49 jastaǵy Roı Djonstyń qandaı qaıratty boksshy ekenin jankúıerler jaqsy biledi. 1988 jyly Seýl Olımpıadasynda 71 kılo salmaq dárejesinde judyryqtasqan ol barlyq qarsylastaryn kúmánsiz utqan edi. Fınalda Ońtústik Koreıanyń ókili Pak Sýhýnmen kezdesti. Bul básekede de amerıkalyqtyń mysy basym boldy. Alaıda ádildikti belden basqan tóreshiler jeńisti jergilikti boksshyǵa alyp berdi. Aramza qazylardyń bul sheshimi úlken janjal týdyrdy. О́z kinálárin jýyp-shaımaq bolǵan AIBA basshylyǵy Olımpıadanyń eń tańdaýly bylǵary qolǵap sheberine tıesili Vel Barker kýbogyn Djonsqa tabys etti. Biraq fınaldyq saıystyń nátıjesi ózgerissiz qalyp, ádiletsizdiktiń qurbany bolǵan AQSh-tyń óreni kúmis medaldi qanaǵat tutty.
1989 jyly Roı kásipqoı rıngte baq synaýǵa bel býdy. 30 jylǵa jýyq ýaqyt aralyǵynda 75 kezdesý ótkizip, 66 ret jeńiske jetti. 47 qarsylasyn esinen tandyrdy. Orta salmaq dárejesinen bastap, aýyr salmaqqa deıin kóterilip, eń beldi nusqalar boıynsha álem chempıony atandy. О́z dáýiriniń eń myqty degen boksshylarynyń barlyǵymen kúsh synasyp, sol jekpe-jekteriniń denin aıqyn jeńispen aıaqtady. Jeńilgen jaǵdaıdyń ózinde jigersizdik tanytqan kezi joq. О́ziniń sońǵy kezdesýin ústimizdegi jyldyń aqpan aıynda ótkizgen áıgili AQSh boksshysy óz otandasy Skott Sıgmonǵa san soqtyrdy.
Djons sportpen qatar, basqa da salalarda ózin moıyndata bildi. «Ibilistiń advokaty», «Jaýynger», «Matrısa: Qaıta júkteý», «Ámbebap soldat – 4», «Solaqaı» atty birqatar fılmderde oınady. Túrli konkýrstarda án salyp, bı bıledi. Rep oqyp, «Body Head Bangerz» dep atalatyn top qurdy. Birneshe albom shyǵaryp, kópshiliktiń qoshemetine bólendi.
Roı Djonstyń Qazaqstanǵa degen iltıpaty da erekshe. Ol óziniń dosy, belgili sport fýnksıoneri Nurǵazy Jarylqapovtyń shaqyrtýymen bizdiń elge úshinshi márte kelip otyr. Biraz qalalardy aralap, qazaqtyń qonaqjaı dastarhanynan dám tatty. Otandyq boksshylarmen júzdesip, olarǵa aqyl-keńes berdi. Taıaýda ǵana Astanaǵa at basyn buryp, Jakartadaǵy jazǵy Azııa oıyndaryna daıarlanyp jatqan Qazaqstan ulttyq qurama komandasynyń múshelerine aq jol tiledi.
Ǵalym SÚLEIMEN,
«Egemen Qazaqstan»
