Atalǵan basqosýda Qazaqstan halqy Assambleıasy oblystyq hatshylyǵynyń meńgerýshisi, tóraǵa orynbasary Bıbigúl Aqqojına, oblystyq Tilderdi damytý basqarmasynyń bólim meńgerýshisi Kenjeǵalı Bımaǵambetov, oblystyq qoǵamdyq kelisim Keńesiniń tóraıymy, aqyn Aleksandra Sýslova, Chelıabi memlekettik ýnıversıteti Qostanaı fılıaly dırektorynyń orynbasary Álimjan Bekmaǵambetov, Chelıabi oblysynyń bilim jáne ǵylym mınıstrliginiń ókili Evgenııa Markına, Chelıabi bilim berý qyzmetkerleriniń biliktiligin kóterý jáne qaıta daıarlaý ınstıtýtynyń kafedra meńgerýshisi Tatıana Soloveva, Chelıabi oblysyndaǵy «Jaqsylyq» qazaq ulttyq-mádenı qoǵamdyq birlestiginiń tóraıymy Iýlıt Baıdáýletova sóz sóıledi.
«Dóńgelek ústel» barysynda Qostanaı oblysy ákimdiginiń tilderdi damytý basqarmasynyń basshysy Gúljan Meńdekenova qatysýshylarǵa jyly lebiz bildirdi. Basqosýda elimizdegi til reformasy jáne jalpy til úırený, ana tilin saqtaýdaǵy kórshi eki elge, eki ultqa ortaq máseleler, sonymen qatar Qazaqstandaǵy qazaq tili álipbıiniń latyn harpine kóshirilýi, onyń júzege asýy týraly aıtyldy.
«Qazaq tili álipbıiniń latynǵa kóshirilýi ýaqyt talaby. Odan qazaq tiliniń ózine keletin eshqandaı nuqsan bolady dep oılamaımyn. Men orys adamymyn, Qazaqstanda orys tiline tónip turǵan qaýipti kórip otyrǵan joqpyn. Til úırený kez kelgen adamnyń baılyǵy, sony bilýimiz qajet. Al óziń otanym dep sanap, ómir súrip otyrǵan elde sol eldiń memlekettik tilin bilý paryz» dedi oblystyq qoǵamdyq kelisim keńesiniń tóraıymy Aleksandra Sýslova.
Chelıabi oblystyq Bilim jáne ǵylym mınıstrligi negizgi, orta jáne jalpy bilim berý bóliminiń keńesshisi Evgenııa Markına qazaq dıasporasy ókilderiniń ana tilin úırenýine oblysta eshqandaı kederginiń bolmaıtynyn, qaıta osy iste birlesip qyzmet etýge daıyn ekenin jetkizdi. Chelıabi memlekettik ýnıvesrıteti Qostanaı fılıaly dırektorynyń orynbasary, zań ǵylymdarynyń kandıdaty Álimjan Bekmaǵambetov Elbasynyń maqalasyna sáıkes «Rýhanı jańǵyrý» baǵdarlamasynyń mańyzyna toqtaldy. «Árkim til úırenýdi, ýaqyt talabyna qaraı jańǵyryp, jańarýdy ózinen bastaýy qajet. Til úırený – qajettilik. Qazaq tili álipbıiniń latyn harpine kóshirilýine ýaqyt ıtermelep otyr. Qazir tórtinshi ónerkásip revolıýsııasy kezinde sıfrlandyrýdy latyn harpinsiz qalaı elestete alamyz? Dúnıe júzinde 80 paıyz el osy haripti paıdalanady» dedi Álimjan Baýyrjanuly.
Reseıden kelgen qonaqtar qazaq tilin oqytý boıynsha kókeıde júrgen saýaldaryn ortaǵa salyp, pikir almasty. Áńgimeni qoryta kele til úıretýde shekaralas eki oblystyń til mamandary yntymaqtasa jumys isteýge kelisti.
Názıra Járimbet,
«Egemen Qazaqstan»
Qostanaı
